樓市出更：巿區供應 舊樓孭「重飛」

政府土地供應集中喺新界區，呢幾年市區新盤供應，唔多唔少要靠發展商併購舊樓。劉Sir知道，有約莫16個呢類樓盤排緊隊等住今年賣，保守估計應該超過1,900伙，如果計埋已經透過強制拍賣統一業權，但係攞緊批文嘅項目，計埋應該有接近2,500伙；而舊年申請強拍嘅個案創晒新高，多達57宗，估計可以再為樓市增添多1,700幾個新單位。

劉Sir從手頭上資料睇到，講緊嗰16個地盤，其中規模最大，係新世界發展（00017）嘅北角上下繼園里同繼園街5號項目，會起3幢連平台31層高住宅，加埋有約莫610幾伙。

北角繼園項目最矚目

呢個地盤喺一○年二月尾透過強制拍賣統一業權，其中拎出嚟拍賣嘅繼園上里繼園樓B及C座，當時底價超過7億。至於佢哋同其他公司合作嘅跑馬地桂芳街1至10號亦有另一個申請過強拍嘅地盤等住今年賣，預計重建後可以提供到約莫80個住宅單位。

至於近年主力透過強拍舊樓攞地嘅遠東發展（00035），今年應該係收成期，佢哋今年有兩個呢類地盤可以拎出嚟賣，包括九龍西洋菜北街項目晉嶺，同埋打緊樁嘅西區山道90至100號；加埋市場呢16個項目合共為住宅市場提供約1,900幾伙。

舊年申強拍個案新高

另舊年有10宗強拍個案統一咗業權，部分到依家仲等緊批則，料可為今年一手樓市提供約720伙。至於舊年入稟土地審裁處申請強拍既個案創新高，多達57宗，而呢57宗個案其實都只係約莫30個地盤，如果全部起晒住宅，講緊有超過130萬呎樓面，保守估計最少可以為市場提供多1,700幾伙，相信都係未來幾年市區新盤供應之一。

其中九龍建業（00034）舊年年頭入稟申請強拍嘅紅磡四條「環」字街，發展商分拆成14宗申請個案，估計重建應該佔咗約900伙。