Fundman睇市：新能源股 日子難過

內地股市五連跌，尋日再隊溫巴仙，拖埋港股落水，過去兩日二三線已有股災味道，跌浪蔓延至藍籌，大市跌333點，跌市成交增加至736億的六日最多，沽空佔成交比例由10.79%升至11.42%，係六個交易日最高。

A股狂牛玩完？睇番滬綜指由去年十二月1,949點升到今年二月2,444點，升幅大約兩成五，對比成熟的華爾街股市，屢次改寫高位紀錄，其實A股唔算升得特別誇張。再睇經濟復甦持續，儘管稍有放慢腳步，通脹也在控制之內，上海銀行同業拆借市場，一個月息率3.33厘，對比一個月前的4厘樓上，唔見資金緊張情況。老友間非正式統計，唔敢買的主要理由，都係怕內地第一季GDP升幅可能低過去年第四季，未知市場會怎樣解讀。筆者仲係傾向相信，今次只係一次中期調整，尤其港股去年才由萬八點水平起步，升了大半年，8至10%調整，其實唔算過分。

基金狂質二三線股套現，光伏股跌到七個一皮，興業太陽能（00750）三個交易日股價累積撻咗25.4%，卡姆丹克（00712）跌16.7%，保利協鑫（03800）跌16.5%。據聞發改委下發的《光伏上網電價徵詢意見稿》，其中光伏發電自發自用部分補貼價每度電僅為0.35元（人民幣．下同），較市場預期的0.4至0.6元為差，青海、新疆、內蒙的上網電價都比估計低，仲要鼓勵競價上網，隨時出現鬥平局面。

低補貼唔單止對太陽能電站利潤有影響，亦間接令設備成本壓力大增，如果真係出手咁低，光伏股肯定閉翳。要知環保係要付出代價，尤其太陽能同其他發電方式唔同，暫時仲未有價格競爭優勢，至少成本同煤電甚至核電都無得比。借鏡太陽能發展成熟的西歐，無論建設太陽能電站，或鼓勵個人家居裝設太陽能板自給自足，開頭通常都係由政府提供大筆補貼。唔想將來長期在霧霾中過活，政府對潔淨能源資助絕不可少，否則美麗中國的願景，恐怕會愈走愈遠。

內房股重現吸引力

事實上，傳聞好多時比壞消息殺傷力更大，好似一早存在，不過無嚴格執行的樓市「限漲令」，尋日舊聞新炒，缸邊仲繪形繪聲咁話深圳「落實」先行，令內房全線捱沽。其中重災綠城（03900）跌9.6%，深圳控股（00604）跌7.8%、融創（01918）跌7.4%，前日先發優先票據（三年期指標息率9.125厘）抽水的佳兆業（01638）跌7.2%。唔少內房股跌番去舊年年底水平，以資產淨值折讓計算，又開始重現吸引力，但若要股價真正見底，仲要等中央正式推出新調控措拖，壞消息出盡先至有偈傾。