股海實戰：沽壓擴散 忍手為上

雖然呢期歐、美冇特別利淡消息，但A股不振，內地基金沽貨班水北上，足以震散本地魚缸，沽壓由光伏和風電股、擴散至其他中資股板塊，如內房、水泥、鋼鐵等，尋日就連部分本地股都照樣被質，如新昌營造（00404）單日急跌一成。尋日首日掛牌嘅新晨動力（01148）收報2.17元，較招股價低2.7%，前日掛牌嘅靄華（01319）亦跌6%。既然大市升唔起，快啲進行調整唔係壞事，且將希望放喺第二季尾。

講上市講咗「N」咁多次嘅光銀，近日又話要捲土重來，但印象中每次重提上市，魚缸就向下走唔多就，都咪話唔「邪」﹗希望班中資大班腳踏實地，咪再堅持以超高估值作價上市，免得誤咗銀行業務發展，兼做了股海明燈！

講到IPO，本來打算喺年中前以A、H股上市嘅銀河證券，聽聞擬取消A股上市，只搞H股上市，相信與A股表現有關。事實上，自從春節假過後人行進行正回購，內地銀根起了變化，本來預期正回購只係短暫現象，但如今睇嚟短期貨幣政策會持續趨緊，尋日人行行長周小川出嚟講嘢口淡淡，進一步確認審慎方向，A股冇運行，港股叻得去邊？另外，近兩年內銀推出各式各樣嘅高息存款計劃，美其名係保本高息，實際上係同投資回報掛鈎嘅理財產品。為免失控爆煲，聽聞銀監正加大力度打擊相關銷售行為，近期A股不振，可能與相關問題有關。總而言之，明眼人都睇到大戶喺度托住指數沽貨，缸邊友唔使心急入市，耐心等候恒指14日RSI落到30樓下（目前處40），先至開始返魚缸Shopping都未遲！

地產股估值要下調

除咗魚缸受壓之外，最近香港同內地都先後推出遏抑樓市炒風措施，亦令兩地樓市轉冷，相信政策成效會喺次季逐步浮現，嚟緊一季本地地主股同內房股都可以少睇。針對本地地產股，尋日滙豐銀行已帶頭宣布調高新做樓按利息四分一厘，相信其餘幾家主要銀行都會跟隨行事，政府徵稅兼銀行調高按貸利息，樓價調整已是無可避免，今年本地地主股銷售前景尚不明朗，唔排除嚟緊大行要下調估值！

至於內房股，自新國五條推出後，各地方政府正籌備推出新措施，嚟緊內銀亦會配合收緊房貸政策，總之務必趕絕投機客，內房股銷售情況亦唔好得本地地主股幾多，相關股票嘅投資策略只宜喺嚴重超賣之下才小注博反彈，買嚟揸就可免則免。