樓市出更：金朝陽靚貨 攬實唔賣

銅鑼灣一線街舖租金冠全球，位於全球知名貴租街道之一嘅羅素街金朝陽中心，舊年全年租金收入超過2.56億元，按年增長保持大約32%，而當中一半租金係來自項目6個地舖。唔怪得業主金朝陽（00878）早排拆售霎東街銀座式商舖項目THE SHARP時，即使單日賣晒樓上29層樓面，但仍然揸住地下至2樓舖位唔捨得賣。

金朝陽尋日公布舊年業績，全年多賺58%至約33.3億元，該公司執行董事及財務總監劉金國同劉Sir講，公司收入來源除咗賣住宅外，唔少係來自旗下收租嘅商業項目。

好似金朝陽中心，樓上依家租戶主要係美容、瑜伽等，目前出租率維持約99%，舊年有約34%租戶約到期。劉生笑言，續租租金升幅好理想，其中樓上續租加幅超過12%，而樓下6個地舖仲勁，升幅達約1.5倍，所以幢大廈舊年租金按年升咗32%至2.56億多元。

THE SHARP沽29層 地舖長揸

佢仲話，雖然內地旅客來港平均使費少咗，但只係某段時間嘅事，由於銅鑼灣一線街舖無新供應，業主無需要平租，所以對區內零售租金前景好有信心，以THE SHARP為例，今年初單日賣清樓上29層，本來地下至2樓都有客洽購，但區內靚舖難求，所以集團已婉拒買家好意；而同區金朝陽中心2期Midtown，地下巨舖有外國大品牌洽租作旗艦店。劉Sir聽聞，THE SHARP賣出嘅29層，料套現逾15億元。

葵涌工廈或今年賣樓花

劉生話，集團睇好商業零售前景，上個月提早成交嘅尖沙咀諾士佛臺10號全幢商廈，依家樓上租戶唔少係寫字樓用戶，將來會大搞優化，考慮全幢變身做銀座式商廈。至於該公司舊年買入嘅葵涌青山公路301至305號工廈重建項目，有機會今年以樓花形式出售。

對於政府頻頻出招，劉生表示，無疑會加重收購舊樓成本。不過，收購係集團嘅本業，所以未來仍會積極物色好嘢，而雙倍印花稅實施之後，炒風即刻收斂，對樓市係好事。