魚缸Blogger：舜宇光學 小注收集

周日派咗成績表嘅舜宇光學（02382）查實業績都算唔錯，可惜周一股價無乜反應之餘，竟然仲要跌逾3%，要到尋日先至爆上，事關大行發功唱好，喺成交急增下，即市一度挾到去8.82元，創咗五十二周新高，埋單仍升11.6%，收報8.75元，睇嚟9蚊關指日可待。

從事研發、生產及銷售光學零件、光電產品及光電儀器的舜宇，去年收入增長近六成，至39.84億元人仔，純利增長逾六成至3.46億元人仔，原因係光電產品業務成功捕捉智能手機快速發展的機會，產品升級迅速兼價量齊升。

大行報告齊唱好

大摩同里昂齊齊唱好舜宇，前者話公司盈利增長強勁、股本回報率改善，同埋努力轉為全球化企業，值得令估值提升，而後者就話內地對高像素相機鏡頭需求旺盛，可帶來盈利增長動力，分別畀佢目標價9.2元同10元。考慮到尋日升勢幾急，都可以等回調後收集，守住尋日平均價8.457元可小注。

舜宇光學（02382）

阻力位：9.30元

支持位：7.67元