期指攻略：待終極一跌再行入市

昨日港股跌勢，感覺是早段三四線股洗倉所帶動，沽壓午後逐漸擴散到藍籌身上，最後拖低恒指。大市終於一連三日即市升穿23,944點至22,445點跌浪的0.5反彈阻力23,195點，但最後都未能守住收市，23,220至23,262點的三個短期浪頂，已成為睇好者的強力阻力位。

恒指穿頭破腳，昨日跌200點，收報22,890點，即月期指收22,792點，較除息後合理價22,822點低水30點，收市前十五分鐘所見，即市博反彈的全線退守，沽貨離場，令收市前低水幅度擴大近20點。

連日來，筆者提議好友要等現貨確認企穩23,220點樓上收市，才試開好倉，事實證明，近日低成交，期指大戶唔難在早市製造假突破現象，使出一招請君入甕，三日的早市假局已證明。

目前更難決定的，是加唔加入追沽行列，尤其美股已連升多日，對淡友而言，一旦港股選擇性地跟升一兩日，像上周五般反彈，隨時左一巴右一巴，筆者傾向等終極一跌，超賣出現才入市買貨。