股海實戰：中國電子估值吸引

尋日恒指跌兩舊，但唔少中資股跌幅有點「股災」味道，似係散貨格。各位宜及時檢討持倉風險，短線想博反彈亦宜嚴限注碼，且須緊守止蝕。近期A股完全唔跟外圍升市走，似乎中資股走低係有迹可尋。

平常心去諗，港股升咗咁多個月，上月動力開始減弱，魚缸唔係升就跌，既然升唔起，調整在所難免，只係估唔到班大戶上周先挾高指數才掟貨，唔排除頂埋呢個季結，次季恒指要回試21,000點支持。

尋日係阿莊開新倉剛滿一周年，回報率64%，對自己有交代。回說組合持股，尋日已預告擬沽出光大國際（00257），好在上晝果斷行事，走遲半步得個吉！至於其餘三隻持股，暫會繼續持有。

金山軟件靜候業績

尋日提及嘅金山軟件（03888）不敵淡風，股價跌4.9%，但基本因素未有變化，股價下跌純粹受跌市影響，且耐心等候業績公布再作評估。提到智慧城市概念，尋日一隻逆市走高嘅股份係中國電子（00085），收報0.99元，升8%，成交1,011萬元。翻睇圖表，原來其股價由上月低位0.67元起步，成交漸轉活躍。

咪以為呢隻係普通細價股，其最終控股股東係央企中國電子信息產業集團，亦係該集團旗下唯一一家紅籌公司，專門研發及產銷智能卡芯片、係WLAN芯片技術最全面、應用領域最廣泛嘅公司之一，產品應用於內地公民所使用嘅第二代居民身份證、社保卡、加油卡、電信卡、購電卡、交通卡、無線網絡設備等。隨着城鎮化發展，對銀行、社會保障、物聯網等領域嘅投入加大，對智能卡嘅需求日廣。藉着央企作為最終控股股東嘅背景，公司喺爭取政府訂單方面具優勢。

再秤一秤估值，去年公司賺1.97億元，按年增72.3%，每股盈利11.68仙，現價往績市盈率8.5倍，NAV每股0.475元，計落估值仲未係貴。難怪外邊風頭火勢，其股價可以若無其事照升可也，上周四現大陽燭後，只係抖咗兩個交易日又再發力。但當然，呢隻股之前交投唔太活躍，短炒唔買得多，且須提防隨時停車熄匙難落車。再講智慧城市概念，長遠雖然對公司發展帶來好處，但效益須時顯現，加上公司未有派息，宜盡量避免高追，中線可待回試0.9元邊承接再作考慮。