樓市出更：旺角商廈29億 九龍最大刁

近排唔少財團都積極將旗下非核心物業出售套現，南豐或有關人士上個月中出招前賣咗旺角亞皆老街113號全幢商廈，涉資約29億元，以單宗商廈全幢成交額計，應該係九龍區有史以來最大宗，今次成交呎價大約8,500元左右。

旺角亞皆老街113號全幢商廈易手，買家係恒生銀行（00011）或有關公司，佢哋依家喺九龍灣租用一幢商廈作後勤用，唔排除日後搬過嚟旺角新址。南豐或有關人士繼早年賣咗兩個商場後，啱啱再賣咗上述亞皆老街113號全幢商廈，作價29億元，劉Sir睇到土地註冊處資料獲悉，買家係HANG SENG BANK LIMITED（即係恒生銀行）。

呎價8500 兩年漲逾20%

代理指出，上址於九六年獲批入伙紙，樓高大約30層，總樓面約莫34萬方呎，呎價約8,500元，聽講幢大廈早兩年市值大約24億元，依家升值逾兩成。

據悉，南豐等喺一○年沽出奧海城海桃灣基座商場，作價約3.5億元；而喺一一年中再賣出將軍澳南豐廣場商場予領匯（00823）。

至於新買家恒生銀行或有關公司依家租緊九龍灣企業廣場5期2座全幢共約26萬方呎，早排續咗租，聽講新呎租近30元，同之前比有約七成升幅，所以大家都估佢哋依家買上述亞皆老街全幢後，日後搬嚟新址。

對於未來商廈後市，萊坊林浩文就話，喺二○一七年多個寫字樓項目開始落成之前，寫字樓供求失衡情況在一六年前都不會有改變。

銅鑼灣地舖逾億元沽出

雖然有加辣招，但唔少業主都無懼出貨，韋堅信測量師行許偉國表示，中環擺花街34至36號1樓至5樓商業樓面依家招標，下月十六日就截標。

此外，有投資者認為有危有機，照樣入貨，中原游家成話，銅鑼灣登龍街36至48號地下F舖連天井以約1.1億元賣咗，呎價大約11萬元，買家係投資者林清林或有關人士，原業主二十二年帳面大賺逾1億元，賺幅約二十八倍。聽講上述林姓投資者於上址隔籬都有一個舖位。

另一方面，該行鄭德明指出，投資者尹柏權分拆嘅大角咀道129至137號嗰7個地舖早前已摸出5個，套現超過7,800萬元，餘下2個諗住加價5%。