股海實戰：金山軟件 隨時突破

雖然尋日恒指僅微跌1點，成交唔到600億元，但唔少中資能源股股價急挫，如股價一路放紙鳶嘅興業太陽能（00750）單日急跌17%，頁岩氣股宏華（00196）、安東（03337）、TSC（00206）跌幅介乎7至9%。聽卜架講，有內地基金大舉沽售能源股套現，而內地券商中金亦發表報告叫人沽太陽能及風電股獲利，引發更多投資者跟沽。睇見尋日啲沽盤快且狠，真係有幾分似係同胞大戶所為！由於同一時間唔見其他板塊有明顯資金流入，係咪班師回京，準備上足銀彈大炒A股，就要等着瞧！

為免殃及池魚，阿莊想減持新能源股，周內會睇位沽出光大國際（00257），至於京能（00579）表現相對強，會再坐一會。另外，尋日提及嘅國壽（02628）突然停牌以待澄清媒體報道，咁即係冇咩特別利淡利好，但港交所（00388）同班輪商就多得佢唔少，皆因國壽停牌少咗唔少交投量！

國策利好周邊行業

住建部官員話，將於本月內公布第二批智慧城市試點名單，內地傳媒更引述分析指，十二五期間用於建設智慧城市嘅投資額可高達五千億人仔，呢個大餅勢將帶挈周邊行業發展，如智能交通、城市管理及民生服務相關配套技術、物聯網、雲計算產業等，不妨喺消息公布前留意相關股份表現。

講開科技股，金山軟件（03888）尋日逆市升2.8%，收報6.92元，成交按日倍增至5,274萬元，公司將於本月十九日宣布業績。金山主要從事軟件研發，目前主要收入來自遊戲業務。去年第三季度經營數據顯示，雖然遊戲軟件相關收入表現相對平穩，但遊戲以外嘅其他應用軟件收益快速增長，主要是金山網絡安全在線廣告收入及金山WPS嘅銷售同創新高。由於去年末季公司推出新遊戲，料全年業績會有好表現。假設末季盈利與第三季相若，估計全年純利達4.15億元人仔，按年增長接近三成，現價預測市盈率約15倍，對於一家處增長期嘅科技公司而言，估值具吸引力。

再睇股價，今年一月下旬見高位7.35元後現回吐，惟已多次成功考驗50日線承接，上周股價重上10日線後未見太大回吐壓力，似係醞釀突破，從公司估值、業務發展及政策方向睇，呢隻股值得價值型投資者關注，且看業績消息能否為股價提供動力。