樓市出更：單幢盤突圍 鬥搞作

三月份係一手市場旺季，相信市場有多達10個新盤爭先出籠搶客。除上個星期出價聽日開售嘅粉嶺逸峯，三個九龍區單幢新盤亦隨時一齊推售，尋日搶先開放示範單位嘅遠東發展（00035）嘅九龍西洋菜北街晉嶺，最快日內開價，入場費約350萬元，仲率先用新例，買家可以分兩次畀樓價10%首期。

遠東發展集團高級營業及市務總監方俊同劉Sir講，晉嶺已經收咗300個查詢，所以日內會開價。

高佣送獎金谷銷情

首批應該會推五層共15伙，以中低層單位為主，開放式單位入場費350萬元左右，兩房單位就650萬元，即供嘅買家可以有樓價5%折扣，而作為良心發展商，佢哋會考慮向首批單位買家送贈雙重印花稅額外多繳交嘅稅款部分。

佢仲話，一手物業銷售規管條例下個月先實施，不過，佢哋已率先按新例向買家先收取樓價5%做訂金，五天後再收埋餘下首期嗰5%樓價。另消息話，發展商首批單位會推9、10、15、16同20樓，而為咗增添競爭力，除咗最高樓價3%佣金，仲會加送1.8萬元獎金，希望重賞代理會有好銷情。

宏安深水埗有部署

除咗遠展，劉Sir仲知道，近幾年以The Met.系列發展單幢式精品豪宅嘅宏安集團（01222），第三個樓盤喺深水埗營盤街142號，今日都會舉行命名儀式，發展商仲會講吓最新部署。

另响市場吹風超過一個星期嘅佐敦珀．軒，發展商莊士機構（00367）本周四亦會開放售樓處，而市傳樓盤尋晚已經派緊貨畀代理配對買家。

細盤有細盤搞，大盤亦有新搞作。恒地（00012）代理嘅粉嶺逸峯，尋日加推咗1座36樓A室連天台特色單位，講緊建築呎價11,500元，創晒粉嶺區分層單位新高。另外，香港置業王品弟話，多個新盤推售，去年第四季一、二手溢價差距只有13%，相信本季會跌穿10%水平。至於政府再出招，令市場不少準買家轉買為租，相信未來第二、三季二手住宅租金會有成15%升幅。