Fundman睇市：中遠短線有機挾上

前晚，道指升125點，收報14,253點，創歷史新高，港股終於被外圍強勢掀動，恒指尋日升217點，收報22,777點，但成交732億，係過去五日最少，比周一個市急跌342點當日的828億少近一成二，反映基金只係沽一百買五十，搵一些超賣板塊埋手。

中央政府工作報告將今年內地經濟增長目標定為7.5%，同去年實際增長睇齊，原先市場估計，今年中央有機會向下修訂目標至7%附近，因此結果令內地股市振奮。另外，為了支持民生開支及維持經濟活力，今年中央財政赤字1.2萬億元（人民幣．下同），比去年增加近五成，財赤佔GDP比例由去年的1.5%升至2%。貨幣供應增長目標為13%，低過去年目標及實際的14%及13.8%，全年通脹目標由4%調低至3.5%，顯示今年中央對控制通脹決心都幾大。

水緊情況甚於往年

當前全球三大主要央行，美歐日都傾向透過印鈔推低匯價，以加速經濟復甦，刺激出口能力，話貨幣戰爭一觸即發，或者誇咗些少，但美國經濟開始復甦，歐洲最壞時間已過，但放水容易收水難，各央行印鈔機無熄機迹象，新興市場包括中國在內，繼續面對通脹與經濟過熱風險，相信今年內地水緊情況，可能甚於往年。

講番股事，國五條威力漸見消化，內房股終見反彈，碧桂園（02007）、越秀地產（00123）升幅都超過4%，睇嚟今浪反彈5至10%的目標，難度唔大。近期個市真係快上快落，前日新能源股係威係勢，點知一日貨仔，推介的保利協鑫（03800）仲要開高收低，認真失禮，但潔淨能源發展是國策使然，保利協鑫本月十四日先出業績，仲有時間睇多兩日。

近兩日二三線鑊氣重現，國策股之外，部分累積沽空多的股票其實都要睇到實。非正式統計，三月上市公司業績black out前，分析員與芬佬約見公司高層活動，反應最冷淡係煤炭及航運股。

尋日留意到，航運股升得唔錯，其中中國遠洋（01919）一度高見4.4元，可惜收市前回番多少，收報4.28元，升幅4.9%，成交亦接近五星期最多。再睇二月初至今，中遠持續被淡友踩到實一實，得三個交易日沽空比低於一成（過去三日平均22%）。按基本因素，舊年最壞時間已經成歷史，一三年預期市盈率1.29倍，比歷史平均2倍折讓唔細，短期成交配合的話，挾番上4.8至5元機會存在。