股海實戰：上海醫藥睇位跟進

兩會繼續發放正面訊息，上半年當局將發布城鎮化發展綱要，擴內需繼續為經濟發展戰略基點。可以預期，嚟緊涉及內需同城鎮化概念相關股份繼續長炒長有。向來投資中企股份，首要條件係順應國策，中長線依據呢條金科玉律，揀選股票唔會有太大偏差。

美股前晚高收，港股順勢高開高走，恒指收報22,777點，升217點。藍籌股中，百麗（01880）升勢稱冠，升3.6%，事緣該股與騰訊（00700）雙雙被納入富時中國25指數成分股。二者中，阿莊較喜歡騰訊，自去年十一月初其股價高見281元後進入調整期，曾回落至240元水平，短線企穩270元水平，新升浪目標直指300元大關。

光大國際伺機食胡

持倉中嘅天津發展（00882）尋日發力，高位見6.7元，收報6.56元，升7%，成交增至1.08億元。上月下旬買入津發時話目標上試6.3至6.5元區域，如今已超標實現，周內會沽出獲利。另一持股光大國際（00257）尋日高位見5.7元，想加注都加唔切，再升多浸，短炒可睇位食胡。

城鎮化涉及嘅炒作範疇甚廣，醫藥股係其中一瓣，上月下旬曾提及嘅國藥（01099）尋日升1.3%，收報25.45元。原來上海醫藥（02607）走勢仲靚，尋日高見17.7元，乃一一年九月以來高位，報17.62元，升2.4%。

有別於國藥主力做藥品及相關機械分銷零售，上海醫藥嘅業務覆蓋醫藥研發、製造及分銷與零售嘅全產業鍊，其中醫藥工業製造規模乃全國第三大，而醫藥分銷規模則位列全國第二大。去年首三季，上藥實現營業收入511億元人仔，同比增長27%；純利15.47億元人仔，較去年同期扣除特別項目後之增幅約12%。正正由於公司涉獵全個產業鏈，毛利率較集中做醫藥分銷及零售嘅國藥更為可觀。

預期去年純利按年持平，現價一二年預測市盈率約18倍，今年盈利可望回復增長動力，撇除併購因素，一三年度預測市盈率約16倍，估值尚未算好貴。以一三年預測市盈率18倍計算，目標價可見19元，建議待回吐考驗10日線16.8元水平承接再睇位跟進，較大支持則喺15.8至16元水平。