樓市出更：工廈踩招皮 炒貨急散

舊年工廈樓價急升，九龍東升幅仲差唔多有一成半，唔少散戶高位入市，點知咁啱遇着政府出招，唔少惟有趁「上會」前劈價離場。聽講區內官塘工業中心第3座有個炒家，喺措施後兩度割價求售，加埋減幅7%，最終可能要平手走。而長沙灣恒昌工廠大廈亦有投資者大幅減價超過11%放售摸貨，即刻吸引兩個收租客洽購。

喺觀塘炒賣工廈多年嘅李姓投資者話，政府上月出招加重工商舖買家入市成本，直接「打窒」短炒活動。劉Sir聽到，有個投資者今年初斥約950萬元買嘅觀塘道官塘工業中心第3座中層戶，呎價約3,800元，開價每方呎約4,200元放售摸貨。

美羅炒家減價跳船

不過，新措施公布後嘅周日，上述單位即減至呎價4,000元放售，日前再劈至3,900元，叫價降至975萬元。

九龍東有散戶「跳船」，賺少少就走，九龍灣美羅中心2期低層戶減價4%放售摸貨，涉資584萬元，呎價7,300元，同舊年底購入價高8萬元。

至於上述永明街恒昌工廠大廈中層戶，減價逾11%放售摸貨，意向價落到約1,600萬元後，呎價只約3,500元，即時吸引兩個收租客傾洽購。而預期今年中入伙嘅荃灣海盛路3號工廈樓花項目，有個低層戶減價約6.5%放售摸貨，涉資約645萬元，呎價約4,300元，屬市價水平。

渣甸坊舖億九沽出

工廈有散戶「腳軟」，但逾億元舖位買家未驚過。收到風恒生銀行（00011）或有關公司今年初截標嘅香港仔大道128號地下A、B及C舖及1樓，有人還價至近1.29億元傾緊。

另外，銅鑼灣渣甸坊單號地下一個面積約800方呎舖，啱啱以近1.9億元賣咗。

租金升勢未停，美聯旺舖朱志龍話，劍橋護老院或有關公司租用最少六年嘅大埔運頭街20至26號地下連1至3樓，擔心嚟緊要大幅加租，剛斥1.45億元租轉買，呎價5,846元。市場資金多，業主都伺機放盤，該行蔡良其稱，中環利源東街1號全幢商用物業開價1.5億元放售，呎價2.7萬餘元，較數年前購入價升八成多。