Fundman睇市：內房股短線博反彈

前日內房股畀「國五條」轟到支離破碎，場面悲壯，尋日內房股仲有多少跟尾沽盤，但已明顯比之前收斂，睇怕壞消息已經反映得八八九九。查實「國五條」在股市已醞釀了一段時間，經歷一月瘋狂發債cap水，餵飽晒班芬佬後，大部分投資者預期兩會之前中央會再出招壓抑樓市，故唔少內房股股價自一月中開始已是有心無力。

實體經濟同股市長遠方向一致，短期錯估形勢常有，股市因應國策顯得審慎，但見內地龍頭萬科A，首兩個月累積賣樓金額及面積，達284.4億元人民幣及244.3萬方米，按年升幅達到49%及28%，二月數字也錄得28%及16%升幅，可見準業主剛性需求不減。預計股價跌定，成交回落，沽壓完成得七七八八，相信短期內房股應該有5至10%的反彈，心水股包括中海（00688）以及恒大（03333），另外，亦可留意尋日隊過龍，收市拗腰收復唔少失地的華潤置地（01109）。

新能源股繼續當旺

港股缺乏消息，人大開幕，A股升都唔跟，恒指得22點進帳，收22,560點，成交額水瓜打狗，比前日少一成得738億元，二三線又比大價股精神，整個大市升跌股份比例為61對39，當中電力、燃氣及新能源股，因為溫總任內最後一份工作報告，繼續提倡經濟持續性，要發展潔淨能源的言論做好。

中國走粗放型經濟之路，社會及環境齊齊負上沉重代價，像近日席捲全國的霧霾污染問題，消失的天安門成為媒體封面，最為震撼，由不同方式估算，空氣污染造成的內地市民疾病成本，每年達5,600萬元至2萬億元人民幣，外圍經濟唔掂，中央也順勢理順以往重量不重質的經濟方針，保八變成保七點五。尋日溫總工作報告，特別提到未來要下決心解決污染問題，話要用實際行動讓人民看到希望。

「綠色發展、循環發展、低碳發展」最後會唔會流於口號化，只能等歷史話畀我哋知，但短期而言，凡涉及可再生能源、節能減排配合國策的股份，一番炒作相信是在所難免。

保利協鑫人氣搭夠

炒概念，隨時快上快落，揀交投人氣較旺的始終感覺較佳，至少唔會有上車容易落車難的情況。大球場保利協鑫（03800），是內地最大多晶硅生產商，多晶硅主要用作太陽能發電部件，歐洲多國縮皮減少對太陽能的補貼，多晶硅價格近年持續下滑，尤其去年歐債危機籠罩，情況更嚴重。一月中，公司發盈警預告全年會有重大虧損，但睇番中期業績由賺35.5億變為蝕3.3億，多晶硅價到近兩個月才見輕度回升，去年下半年業績難睇已是預期之內，綜合大行估算全年蝕7.97億，看來已是相當樂觀。

盈警後，保利協鑫股價不跌反升，一月底曾升至2.33元，之後在1.9至2.2元之間浮沉，業績見紅看來已充分反映。尋日溫總的「美麗中國」言論刺激成交大增，或未必適合揸住等三月十四日份業績見光，但在大環境利好下，短期或者可以再挑戰一月高位。