股海實戰：京能潔能 順勢跟住

呢期缸邊友最好當指數冇到，事關若然睇住指數做嘢，持貨信心多少要打個折扣。好似尋日恒指一度升過百點，但埋單僅升22點。少理指數升跌，專心炒作新能源及環保等國策股，持倉回報應該可以跑贏大市！

本周一見報推介嘅華能新能源（00958），目標價2.2元尋日經已實現。持倉中嘅光大國際（00257）雖然升勢相對慢，但勝在基本因素好，揸得安心，尋日高位見5.38元，收報5.32元，升2%。

大手上板成交激增

有智慧不如趁勢，繼續揀新能源股，京能清潔能源（00579）交投異動，連續兩日有大手上板，其中尋日上晝市前有三宗大手上板，涉及股數合共40球，作價1.7元，之後股價向上，全日高位見2.03元，收市報1.92元，升7.8%，成交3.41億元。

京能潔能喺前年十一月上市，當時招股價1.67元，之後股價長期處於橫行狀態，波幅大致處於1.5至1.9元，交投並不活躍，嚴格嚟講掛牌咁耐都冇大炒過。至上周五成交股數增至47球、前日1.5億，尋日1.8億。照計收咗咁耐貨，都收乾收淨，若然呢鋪真係開車，股價升勢不容低估！

京能潔能母公司為京能集團，同系公司包括A股上市的京能熱電，而京能潔能主要從事燃氣發電及供應，其次係風力發電，另兼營水電等業務，去年上半年賺4.23億元人仔，惟首三季度純利僅3.8億元人仔，即係話下半年盈利情況轉差。

不過，舊年下半年經營不景氣係全行業普遍出現嘅情況，股價表現亦已作反映。反觀京能潔能係北京市屬最大嘅清潔能源發電企業，年初以來北京嘅空氣污染情況嚴重人盡皆知，相信喺社會環保意識增強、國策支持以及背靠北京市政府下，未來京能潔能將處於更有利嘅位置發展清潔能源業務。阿莊計劃1.9元或樓下水平上車，中線目標上試2.3至2.5元區域，止蝕位1.7元。

此外，尋日圓匯貶值概念股亦受追捧，零食股CEC國際（00759）一升就19%，收1.17元；另一個零食商四洲（00374）亦唔輸蝕，升16%，收報2.78元，但交投細，僅128萬元，論當炒無疑係CEC較合適。