樓市出更：摸王都怕辣 棄購力寶

政府最近實施的雙倍印花稅「辣招」真難啃，有唔少投資者都要壯士斷臂，「摸王」黎汝遠同劉Sir講，計過數後覺得上個月以4,000萬元買嗰個金鐘力寶中心1座低層戶貴咗啲，所以最後都係決定唔要。代理話，呢件可能係出招後首宗商廈取消交易。甲級商廈叫價仍企硬，金鐘海富中心1座高層交吉放盤，叫價1.5億元。

投資者黎汝遠（黎Sir）話，新措施後，揸貨成本高咗，買家入市前要諗耐啲，出手又低啲，由於摸貨唔等得，加上上述力寶中心單位入貨價貴咗，相信有興趣人士可能有心無力，畀唔到價，所以都係決定取消交易。

廟街舖難出貨 炒家斬纜

事實上，政府出招後，不少投資者都「跳船」棄購，其中油麻地廟街一個雙號地舖，出招前以約5,500萬元賣咗，投資者覺得出貨有難度，最後決定取消交易。

有代理話，黎Sir上個月以約4,000萬元購入上址力寶中心單位，面積約2,000方呎，呎價約1.95萬元，今年八月左右成交，業主依家放番出嚟賣，叫價加約莫一成至約4,300萬元，呎價約2.15萬元。

事實上，甲級商廈業主唔憂賣，叫價唔受大市氣氛影響，領域佳士得國際地產陳顯懷同劉Sir講，同區海富中心1座高層戶依家交吉放盤，意向價約1.5億元，呎價達約2.46萬元屬物業新指標。美聯商業鄺寶謙話，九龍灣億京中心A座8樓寫字樓戶連一車位推出招標，意向價大約1.5億元。

擺花街地舖錄2.9億成交

政府出招前，市場確實有唔少逾億元大額成交，其中近年成為城中名人及投資者追捧嘅中環擺花街，就係好例子，據土地註冊處資料，條街23至39號地下E舖上個月頭錄臨時買賣登記2.9億元，據悉呎價約7萬多元。另黃大仙滙豪山滙豪坊零售部分都係上個月頭錄臨時買賣登記1.25億元。

此外，土地註冊處資料顯示，觀塘偉業街91號一項工業物業出招前錄臨時買賣登記1.438億元，據悉現有樓面呎價約7,000元。

另外，由老牌家族持有嘅荃灣業成街16至18號全幢工廈，早前已獲批改裝做商店及服務行業，啱啱收到風，幢大廈獲出價約1.6億元洽購。