樓市出更:何文田百億地王凍過水

政府推出樓市新辣招後,緊接取消勾地,希望更有話事權去增供應遏抑樓價,之但係咁樣隨時會遏抑埋地價。好似今季賣地計劃「重頭戲」何文田常樂街豪宅地會喺今個星期五截標,有測量師老友話,喺新措施下投資呢類大型項目有一定風險,仲隨時「百億不保」,估值最低約莫90億元。至於同日截標嘅一幅東涌商業地,睇嚟反應都唔會太熱烈。

今季賣地計劃政府主動推出嘅6幅住宅地當中,就以上述何文田常樂街與常盛街交界豪宅地最受市場矚目。劉Sir知道,地盤可建樓面多達約114.2萬方呎,唔少市場人士都認為,塊地係市區罕有大型豪宅供應,要成為「百億地王」基本上問題唔大,甚至可以問鼎歷來政府賣地史上最貴地王,市場估值最高達到約莫148.5億元,每方呎樓面地價約1.3萬元。

項目規模巨 僅啱大財團

不過,正正由於項目規模龐大,適逢政府推出樓市新辣招不久,所以劉Sir都覺得標書數目唔會太多,個別測量師老友更估計,地皮未必好似市場預期咁可以躋身「百億地王」行列。

第一太平戴維斯陳超國同劉Sir講,地皮規模龐大,涉及相當投資額,「食得起」嘅發展商唔係咁多,相信只有部分大型發展商能夠負擔,喺樓市新辣招陰霾下,投資呢類大型項目有風險,估計競投財團出價會反映有關因素,佢對地皮可以成為「百億地王」亦有保留,預期成交價約90億元。估值係市場現時下限價,折合每方呎樓面地價僅約7,880元。

東涌商業地最高估16億

另外,上述東涌第3A區商業地亦會喺同日截標,地皮佔地大約10.8萬方呎,可建樓面約54萬方呎,陳超國話,東涌唔係傳統商業地區,呢幅商業地亦較「蝦人要」,預計反應亦唔會太熱烈,估計每方呎樓面地價約1,500至2,000元,即估值約8.1億至10.8億元。該地最高估值則約16.2億元。

劉Sir

何文田常樂街豪宅地佔地約25.9萬方呎,有測量師對地皮成交價不表樂觀。(資料圖片)