老闆娘美容炒股皆靚

財政獨立、享受高質生活、擁有私人物業，並且開設自家美容院的黃裕華（Rita），是個不折不扣的單身貴族，過着上午炒股，下午搞美容生意的寫意生活。如此悠然自得，當然自有一套投資妙計，就讓她來教女士們如何聚沙成塔、累積財富！

人人都希望生活無憂，有車有樓，閒時出國旅遊。但物價年年飆升，打工仔薪資分分鐘連通脹都追不上，享受人生成為癡人夢話。為改變形勢，Rita成立百萬元的私人投資基金，自己擔正基金經理，不假手於他人。

原來她投資有道，將七成資產投放股票市場，每年平均取得逾20%的回報，相等於年薪20萬元，加上美容院的收入，已經足夠她「印印腳」歎世界。

用孖展穩賺20%回報

如何穩賺20%回報﹖Rita話最緊要是準確判斷升市，並會借孖展倍大回報。「我會用恒指走勢做指標，一旦認定係牛市，就會大手買入金融類別股份，例如港交所（00388），因為升市交投驟增，港交所一定會跟住升。另外，大型藍籌股孖展按值夠大，亦係我嘅不二之選。」

Rita○七年開始運用孖展炒股，當年她趁牛市利用孖展以小博大，單單一隻中國移動（00941）已經賺逾倍，其他股票亦贏到開巷，可謂她投資的全盛期，至今說起仍然津津樂道。

不過，孖展猶如雙刃刀，一旦睇錯市隨時傷上加傷，Rita稱自己不會盡用按值，並且會先在正股市場賺上一筆，才利用此利潤來借孖展繼續玩。她稱：「萬一睇錯都可以即刻斬倉，就當先前無賺過。」

以現時市況為例，Rita自去年恒指19,000點開始大手買入多隻股份，賺咗一輪之後，正靜候今年繼續升市，蠢蠢欲動借孖展再倍大回報。

她指出，在多國央行持續量化寬鬆、美國經濟數據做好，加上內地GDP企穩等因素影響下，股票市場在今年上半年仍會有上調空間，會密切留意入市良機！

做足功課 唔熟唔玩

其實，Rita起初亦與一般打工仔無異，○四年始意識到必須擁有自己的投資計劃，並且報讀相關課程，實行先向高人請教。Rita認為要在股票市場上大撈一筆，勤力相當重要。

「投資一定要做足功課，不能講運氣，窩輪、牛熊證等投資工具我都有掂過，並且有獲利，但投資不外乎想搵錢，玩咁多樣會令自己分身不暇，所以我叻邊樣先玩邊樣，而且會睇圖、做技術分析。」

盲從乃投資一大禁忌，Rita「唔熟唔玩」的原則使她避過○八年金融風暴一劫。「當時感覺勢色唔對，一路減持手頭上嘅股票，但真正驅使我一次過沽晒所有股票，係因為要離開香港工作，如果我無時間睇住個市，我寧願唔玩。」看來這位單身貴族深明投資之道，踏上千萬黃金大道指日可待。

上午睇市 下午睇生意

愛美是女人的天性，熱愛投資搵真銀的Rita亦不例外，甚至開設美容院幫客人變靚。由於客人大多在放工時間光顧，剛好與收市時間脗合，令Rita魚與熊掌兩者兼得。

Rita於○九年尾與朋友合辦美容院，雖然投資市場的回報遠比做生意為高，但Rita志在與客人交流扮靚心得，又可以率先嘗試最新的美容產品，索性就上午炒股、下午做生意，不亦樂乎！

結識志趣相投朋友

她稱﹕「炒股回報雖高，但開美容院就好似親手湊大個BB咁，由零開始，睇住佢一步步上軌道，好有滿足感。而且投資係好個人嘅活動，搞美容院就可以識到好多志趣相投嘅朋友，同客人熟咗咩都傾得，變咗朋友聚腳點咁，好開心。」

談到炒股與美容事業的心得，Rita指出兩者均須求「變」。「股票市場要從低位捕捉升浪賺錢，美容行業同樣亦要尋求日新月異嘅產品，留住客人。」

因此，Rita每天花大量時間吸收資訊，包括股票及美容資訊，回家寧願不看電視也要爭取時間學習。她滿足地指﹕「投資、美容都係我嘅事業，我享受兩者並存嘅感覺。」

黃裕華（Rita）小檔案

職業：與朋友合資開辦美容院

每年平均投資回報：逾20%

近期投資策略：等恒指再上調就借孖展

投資金句：投資要做足功課及當機立斷，切忌跟股票談感情