期指攻略：大市超賣暫不追沽

真係捉到鹿唔識脫角，上星期見各技術指標，明顯反映市底動力日益減弱，於是以三分一注開淡倉過周末，周一見港股無跟美股裂口急升高開，急急平倉，原來好戲仲在後頭，藉意大利政局不穩，淡友加兩錢肉緊，尋日恒指低位22,510點，剛剛跌穿恒指十一月起步位21,098點至浪頂23,944點的0.5升幅回吐支持位22,521點。

美股恐慌指數前晚急升4.82，至18.99，創今年高位，隔晚道指穿頭破腳，短期走勢不容樂觀。二月期指昨以22,580點開出後，好友嘗試反撲，惟止於22,757點，稍高過周一即市低位22,747點。淡友重新主導市況，午後藉歐股低開，跌穿22,608點後，即市博反彈止蝕盤湧現，把交易區推到22,520至22,570點之間。

雖然錯過了昨日的跌市，但筆者不打算追勢，尤其9日RSI已去到25，屬近七個月來第一次出現的極超賣水平，較穩陣都係等現貨先回補23,026至23,163點下跌裂口，先至再沽過。