Fundman睇市：高鑫零售買唔落手

內地上月PMI較預期弱、人行數度進行正回購變相收水、上月聯儲局議息紀錄引發退市疑慮、加埋意大利國會可能需要重選，令削赤計劃能否如期執行畫上問號，喺負面消息一籮籮下，尋日恒指一跌就三舊，以全日低位22,519點收，大市升跌股份比例去到15對85，是踏入一三年以來最一面倒，沽空佔大市成交比例由9.74%升至12.04%，是去年八月三十一日以來最高，可見大孖沙清倉不特止，仲要沽凸賭跌。

主觀因素，近期歐元、英鎊、日圓大弱勢，美元則轉強。歷來美元強對港股都不太有利，而且即將踏入三月業績高峰期，唔少公司已經black out，可見短期內無新炒作消息曝光，加上去年第三、四季港股升幅唔細，早已將業績復甦透支得七七八八，至於第四季業績唔掂的，芬佬早在過去兩個月派得就派，避免揸住等成績表衝擊股價。

負面因素籠罩港股

另外，人行春節假期歸來未停過正回購，抽走市場游資，收水的取向已是路人皆見，配合日前溫總公布新國五條，即使內容大體屬新瓶舊酒，但市場揣測，三月份兩會前，會有更多細節公布，新一輪壓抑樓市措施包括擴大房產稅試點範圍，將不日上映。睇落成個市好消息一單都無，不明朗因素就掃埋一籮籮，技術上，今年一月二日大市勁升655點，當日恒指最低位22,860點，比尋日收市價22,519點高，意味今年入市的，大部分已經被綁，未來可能成為每次反彈的新阻力。

尋日飯局，同幾個賓架傾開，非正式統計，認為今浪要從高位回吐一成，先會再有買貨意欲，以高位23,944點計，跌一成要見21,549點，跟目前仲有成千點距離。之前建議由三四五線股轉返去揸防守力及流通量較高股份，假如已經轉好貨，應該唔怕尚餘的一千幾百點跌幅，如果叻到全身而退揸住「茄薯」，倒不如疊埋心水等執平貨。

近期打頭陣出業績的內地百貨零售股，暫時仲係有驚無喜，百盛（03368）業績跌24%至8.51億元（人民幣．下同），差過大行預期，尋日股價連5元都守唔住，上市七年，得番當年上市價一半！茂業（00848）去年少賺25%至8億元，百麗（01880）預告業績只及市場預期中下限，昨日留意到唯一逆市奇葩高鑫（06808），都算係百貨股中最強勢一員，尋日有0.4%進帳，但往績市盈率44倍，即使去年業績有四至五成增長，依然是貴絕同業，揀唔落手。

尋日提過的安踏（02020），去年業績跌21.5%至13.59億元，以慷慨派高息頂住股價，不過尋日仍要再跌6.6%，可見市場暫時唔多「受」。而老早預告去年盈轉虧的國美（00493），上星期表示內地樓市交投轉旺，年初家電銷情遠超預期，之後死貓彈見過0.96元，但遇着連日跌市，尋日最低落到0.81元，與一月初高位1.18元比較，累積跌三成一，走勢疲弱，正好反映復甦故事已經唔足以討好只爭朝夕的基金經理，惟有等三月底，好好醜醜業績出埋至算。