股海實戰：華潤燃氣醞釀突破

美股前晚大跌，拖累港股走低，恒指話咁快回落至22,500點水平，唔少早前熱炒嘅股仔都走晒樣，好似隻國美（00493）落番0.82元、保利協鑫（03800）同中國無線（02369）均跌穿2元、人和商業（01387）碌番落0.5元水平。首季大市極大可能已見頂，技術上10日線已跌穿50日線，死亡交叉預示後市尚要再尋底，調整浪持續一季半季並唔出奇，暫宜保留實力，至22,000點再考慮博反彈。

港交所（00388）將於今日宣布業績，尋日股價隨跌市回落1.7%，相信業績因素已一定程度反映喺股價上。阿莊認為，短期開設期指夜市對港交所股價影響有限，反而上半年IPO市場是否有起色，足以左右其股價走向。再睇其他板塊，電池股繼超威（00951）披露去年度業績僅溫和增長後，理士（00842）尋日發盈警，預告去年純利按年大跌，睇怕今日呢個板塊又有震盪。

新華保險有承接

內地魚缸亦唔好得去邊，滬綜指向50日線（2,277點）進發，尋日收報2,293點，跌32點，查實兩地金融股沽壓頗大，尋日恒生中資H股金融行業指數跌逾2%，國壽（02628）、太保（02601）及招行（03968）均跌3%。MSCI系列指數成分股最新變化將於明日收市後生效，其中新貴包括新華保險（01336）及人保（01339），尋日見隻新華股價跌落29元樓下有買盤趁低吸納，若今日再成功考驗29元關支持，會考慮小注博反彈，初步阻力喺10日線30.48元。

想穩穩陣陣做季結，也許燃氣股會係其中一個避險之選。近期多個內地城市正醞釀上調氣價，加上兩會期間料有支持使用環保能源措施出台，燃氣板塊嘅國策概念帶來抗跌力，見尋日中國燃氣（00384）、中油燃氣（00603）及華潤燃氣（01193）均逆市靠穩。

講到潤燃，去年十一月曾配股，每股作價16.95元，之後股價曾下試16元水平承接，向上則受制於17.5元。上月下旬，其10日線重上50日線，春節假後復市以來，其股價基本上守穩10日線之上，似正醞釀向上突破。事實上，除咗板塊表現靠穩之外，去年十一月公司配股集資27億元，講到明會用嚟收購更多下游城市燃氣分銷業務，咁講法唔排除年內會有併購活動。再睇喺多隻燃氣股之中，潤燃嘅估值唔算昂貴，現價一二及一三年度預測市盈率分別為22倍及20倍，股價主要支持仍然喺16元水平，升穿17.5元嘅話，下一阻力位喺五十二周高位18.52元。