樓市出更：香港仔工廈價逼東九

市區優質工廈依然低水，可以改裝或重建作其他用途，升值能力非同小可。啱啱先話香港仔海旁嘅興偉冰廠凍房，有人6億元洽購，尋日喺正隔籬嘅工廈興偉中心，原來舊年買賣成交竟然有14宗，上個月尾更加有財團豪擲1億元掃入33樓頂層全層，呎價3,600幾元，係近年幢大廈最大額成交。有代理話，幢大廈最正係擁無敵海景，若日後嗰段工業地帶改變用途，樓價勢必飆升。

劉Sir獲悉，上述田灣海旁道7號嘅興偉中心工廈，舊年有成14宗買賣成交，呎價由約3,000多至4,800元，都算幾好價，拍得住九龍東同類工廈，有價有市。今年已經有好幾宗成交，其中33樓上月底以1億元成交，以面積約2.7萬多方呎計，呎價3,600幾元，買家係佑傑發展有限公司。另外，該廈低層14室舊年就以1,500萬元賣出，呎價近4,500元。

有代理話，投資者鄧鉅明或有關人士喺隔籬嘅興偉冰廠凍房，有客畀6億元同佢洽購，可能係嗰區真係就嚟變天，投資者都唔執輸，豪擲資金掃住貨先。

大角咀聯手放 嗌3億

全幢工廈可塑性高，有業主們籌夠相當業權齊賣盤。美聯工商李麗嫦話，大角咀榆樹街9號新型工業大廈一班小業主，依家聯合全幢百分百業權放盤，叫價3億元，以現樓面計，呎價約5,800元，幢大廈喺住宅（戊類）內，新買家可以考慮重建住宅。

近排資金轉投酒店，有見及此，美聯商業袁錦培話，喺灣仔未來合和中心2期附近嘅皇后大道東79至85號商廈集富中心，由投資者持有嘅其中20層已獲發酒店牌嘅樓層，佔項目業權逾82%，依家招標賣，叫價4.2億元，招標物業涉及40個酒店房，即係每個值約1,000萬元，下個月二十六日就截標。

長沙灣擎天劈價摸出

新招無減業主放盤意欲，美聯旺舖游院玲話，九龍窩打老道86至86E號萬基大廈地下B2號舖及1樓全層與4樓33個車位，依家放盤叫價約4.4億元。美聯工商黃偉寶稱，政府上周五晚宣布新招，長沙灣擎天廣場30樓全層寫字樓當晚十二點前及時減價7%摸出，呎價6,000元唔夠，涉約3,470萬元，約三個月帳面仍賺近150萬元。

舖位方面，有代理話，投資者「物流張」舊年九月以7,950萬元，向影帝梁朝偉買嘅中環威靈頓街73號地舖，依家有客畀到近9,000萬元洽，個價期內升約13%。

另市傳本地老牌百貨公司承租旺角瓊華中心1至3樓共3層零售樓層，月租約600萬元，呎租約200元。