股海實戰：中石化有力挑戰10元

政府再度出招打壓樓市炒風，地主股尋日一如預期受壓，但幅度尚算溫和，反觀代理股成重災區，美聯工商舖（00459）、美聯集團（01200）及21控股（01003）跌幅介乎4至25%。阿莊認為，地主股已被政府戴上緊箍咒，相信中線難有運行。

再睇番中資股表現，滙豐二月份中國製造業PMI初值略遜預期，料部分原因受春節因素影響，惟見A股未有有太大反應，滬綜指升11點收市，報2,325點。市傳兩會前中央可能再推有關調控房地產市場嘅措施，加上有關重慶市再提高個人房產稅起徵點嘅報道，內房股反彈乏力，中渝置地（01224）跌4.5%、富力地產（02777）跌3.9%，龍頭股中國海外（00688）表現算堅挺，收報22.45元，微升0.6%。

天能動力大戶震倉

異動股方面，市場聚焦兩會話題，環保股炒作沒完沒了，尋日天津創業環保（01065）股價升8.7%，收報3元；已披露擬供股嘅新環保能源（03989）升13%，收報0.375元。

上周電池股發圍，但尋日全線走低，皆因超威（00951）預告去年純利僅增12%，股價即刻唔見12%；天能動力（00819）亦受拖累，跌3.8%，暫睇有機會係大戶乘機震倉，天能守穩5.5至5.6元水平，升浪仍有望延續。

此外，前晚發改委公布今年首次調高成品油價格，但市場熱切期待嘅新成品油定價機制則未有同時公布。兩桶油─中石油（00857）及中石化（00386）分別升0.1%及0.4%。其實，即使真係推出新成品油定價機制，亦不一定就可以令油價回落，但就可以令國內油價變化節奏更能與國際接軌，咁樣對煉油企業意義較大。

中石化嘅煉油業務有望喺今次提價措施中受惠，講起中石化，早前突然宣布配股集資兩百多億元，市場憧憬公司將會落實收購母公司上游油氣資產。雖然中石化指注資未有時間表，但若然大拿拿攞咁多錢唔做嘢，睇怕班芬佬股東都唔肯過佢！

睇埋股價走勢，本月初中石化股價有一下跌裂口（介乎8.77至9.27元），近三周股價調整喺8.5元水平現承接，尋日收報8.8元，若能向上回補月初下跌裂口位，有望確認調整完成，重拾升軌，中線重大阻力喺10元心理關口，若短線回吐再次成功考驗8.4至8.5元水平承接，可小注一試。