Fundman睇市：百麗博反彈唔划算

尋日恒指急跌四舊，成交增至811億，是港股龍蛇跨年九個交易日以來最多，沽空比例亦由10.7%升至11.1%，大孖沙沽得賣力。跌市最大嘅導火線，係來自聯儲局的一月份會議紀錄顯示，部分聯儲局委員關注到繼續買債的風險，牽動股民「美國退市」的神經。

去年聯儲局主席伯南克提出，將退市和就業市場掛鈎，要失業率降至6.5%（目前為7.9%），通脹高於2.5%，才考慮調整目前每月850億美元的買債規模。但要就業職位大幅回流美國，足以推動美國失業率改善，甚至牽動高通脹，令美國CPI重返2.5%樓上，唔係話咁易。○八年推QE1以來，無人會認為印鈔機會無限期開動，難怪股、匯市對聯儲局會議紀錄反應極大。不過值得留意的是，前晚聯邦利率期貨及美債孳息，變化有限，市場對最快一四，甚至一五年才逐步退市的共識，其實無太大改變。

港股後市仍樂觀

早前美股破萬四點創新高，港股開始跟唔上，近日大市牛牛皮皮，基金想買又唔想高追，市場就係等一宗能夠打破僵局的消息，今次終於等到。筆者對後市先調整再升過的睇法不變，錯過去年第四季升浪，錢多貨少的，可以等退市預期充分在股市發酵，先施施然把心頭好放入購物袋。

身處大跌市，好消息威力減弱，反之壞消息破壞力大增，基金愛股百麗（01880）出業績預警，預期一二年利潤介乎42.87億至48.54億元人民幣，是分析員預期的中下限。消息一出，股價急跌16.7%，收15.28元，成交額超過20億元，乃十六個月以來最勁，並拖低恒指45點之多。

所謂一沉百踩，對估值向來唔平的百麗，分析員自然就踩得更用力。昨日所見，最淡的瑞銀估去年第四季同店銷售增長可能得2.8%，仲話百麗冬季貨品優惠已經推到落四五折，扣折比過往最多的五折更大，反映清存貨壓力增加，估今年同店銷售倒退，目標價11元，建議沽出。

史提芬一向對高增長高估值股票都有點抗拒，經過尋日一跌，百麗一三年市盈率19.1倍，仍比恒指平均的11.5倍高一截，假如增長預期由以往的20至25%，降到10至15%，現價百麗仲有啲貴，即使唔排除有技術反彈，見16元左右，但值博率真係好有限。