股海實戰：國藥 估值具上調空間

美國現「退市」恐慌，加埋中央正研究部署再次出招調控樓市，消息震散港股，恒指最低插到落22,828點，收報22,906點，唔見四舊，成交達814億元，似乎真係有好友沽貨投降。阿莊尋日話，恒指要上番23,500點水平始能言穩，如今既已向下跌穿23,000點關，短線支持區下移至22,500至22,800點水平。

前日買入嘅中傳動（00658）令人喜出望外，尋日唔少風電設備股隨跌市回吐，但中傳動股價仍相當精壯，高位見4.06元，收報4.05元，升4.1%，成交6,630萬元。雖然大成交衝穿4元關表現比想像中強，但考慮到市況明顯轉弱，有胡唔食罪大惡極，故先行沽出獲利。

此外，留意到隻光大國際（00257）股價偏強，尋日跌市，該股仍能企穩喺5元關樓上，相信月底公布業績前後股價可更上一層樓，繼續企穩5元樓上會考慮上車，目標睇5.5元，支持位在4.8元。至於尋日推介嘅通達集團（00698），股價逆市靠穩，但仍傾向待回試0.55元水平再作跟進。

尋日手機瘋傳有香港醫院接收沙士病人，後來證實係流料，不過，目前係流感高峰期就係事實，尋日亦見到幾隻醫藥股逆市靠穩，好似阿莊持有嘅中國製藥（01093）升1.9%、上海醫藥（02607）升1.4%、同仁堂科技（01666）升0.4%，國藥控股（01099）則升1.4%。

醫藥股受惠城鎮化

講到醫藥股，其實亦屬城鎮化受惠股範疇，從事藥品分銷嘅國藥擁有分銷網絡嘅規模優勢，雖然去年首三季內地經濟尋底，但公司仍錄得佳績，期內收入突破一千億元人民幣，賺14.6億元人民幣，相信年度業績唔會差。

截至去年六月底止，其直接客戶有近一萬家醫院，在三級醫院中市佔率達93%，另有十二萬家其他客戶；其醫藥零售業務前景亦有可為，喺主要城市設立直營或加盟經營零售藥店網絡，已擁有1,801家零售藥店，其中直營店有1,637家。憑着分銷網絡規模效益，公司毛利率維持穩定於8%左右，喺銷售額不斷擴大之下，利潤前景能見度高。

以國藥現價計，一三年度預測市盈率約19倍，若然去年末季數據優於市場預期，估值有進一步上調空間。跌市買貨別心急，料短期波幅介乎22.5至26元，可候試波幅區底部支持再睇位上車。