樓市出更：霎東街18層預留 鬥快放

全城商用物業狂拆售，梁昌家族或有關成員持有嘅銅鑼灣霎東街15、17、19及21號Oliv銀座式商舖樓花盤，尋日突然聽到話拆售，其中18層喺即日已極速獲預留，料涉資共約13.5億元，平均呎價3.8萬多元，比起隔籬THE SHARP上月售價高約10%。聽講已預留咗單位嘅買家，已經即時口頭放售摸貨，叫高最少10%。

有梁昌家族成員同劉Sir講，佢哋而家同啲地產代理傾緊上述霎東街樓花盤銷售安排，暫時叫幢物業做Oliv，可能第日連命名賣。

但有代理老友話，發展商暫時唔賣上址地下至3樓及24樓連天台，而尋日幢物業18層就全部獲預留，呎價由約3.7萬至4.2萬元，以每層約1,800多至2,000多方呎計，每層涉資約7,600至8,000多萬元。

「物流張」7150萬入貨

至於幢物業頂層連天台，聽講開價九千幾萬，呎價4.88萬元，以價高者得形式競投，今晚十二點凌晨截止。聽講大部分係住宅客外，投資者「物流張」以約7,150萬元預留中層，呎價約3.7萬元，內地客都有問盤，但有冇預留就未知。但市場已有即時口頭放售摸貨，叫價提高最少一成。

近排全城瘋狂拆售，就講THE SHARP，今年初單日速拆售出5至28樓共29層，呎價由約3萬至4.8萬元，套現逾15億元。而早前紀惠集團廖偉麟亦拆售尖沙咀厚福街H8，全幢在約一周多內以約8.2億元全數拆售，帳面速賺逾1.5億元，賺幅逾22%。美聯工商舖（00459）行政總裁黃漢成話，今年黃竹坑會有3個商廈樓花盤會陸續推售，呎價相信要過萬元。

葵涌成功中心六億洽

另外，億京嘅觀塘及長沙灣工轉商項目短期推，新地（00016）觀塘海濱道181號商廈樓花盤亦快賣，今年整體工商舖會好旺。近月大孖沙大手掃貨，聽講「舖王」鄧成波已批酒店活化嘅葵涌成功中心，獲基金出價約6.1億元洽購，即每間房約260萬元，有指鵬里基金亦有興趣。

而投資者羅珠雄，摸出觀塘怡生工業中心10樓A室，涉資3,260萬元。