期指攻略：失守23100追開淡倉

好嘅唔靈醜嘅靈，A股昨春節後復市，在一片高開的預期下，開高收低。昨日恒指以全日高位23,477點開出後，已無力再攻，同初四升市的即日高位23,469點相比，只係將下跌裂口修補多8點。

睇埋現貨主板成交得512億元，同上周五的466億元，分別係今年來尾二及最低紀錄，市況納悶之極，10日線跌穿20日線出現熊交叉，短線動力減弱訊號明顯下，有利淡友逐少的測試揸家的忍耐力。

初二抽升後，現貨及二月期指交易區相當狹窄，分別為23,300至23,477點，以及23,265至23,483點之間，無明顯操作空間，值得留意，期指一連三個交易日同10日線（23,411點）擦身而過。

雖然筆者稍為傾向認同短期調整未完，不過硬要押注做單邊，實在無謂，較理想的做法，還是等破位才追價，例如等恒指及期指完全補回裂口（分別在23,637及23,620點）並企穩才再開好倉，或者等指數破23,100點的雙底才去追淡。