有利有幣：日圓超賣短線博反彈

G20會議繼續淪為「吹水會」，會後聲明重點在於未有點名日本操控匯率，換個角度去諗，雖然一眾國家畀面日本，未有在聲明中加以批評，不過私下口頭警告相信少不免，日本當局想再單單以出口術就令日圓進一步下跌已變得困難。

市傳日內安倍晉三將宣布新任央行行長，對日圓走勢影響極大。消息人士就指安倍想搵有政府經驗嘅人才。如果係咁，前日本財務省官員武藤敏郎暫時處領先地位，佢擁有財政及貨幣政策經驗，重要嘅係同執政黨員關係密切。不過央行行長人選需得到國會兩院通過，執政自民黨在參議院未有多數議席，又必須要同反對黨合作，其中已有人表示反對由前財經官僚出任央行行長。

而且就算新行長順利上任，都可能要等到四月時的央行利率決議先推出新措施，之前呢段時間似乎有利日圓先行反彈，以修正已嚴重超賣的技術走勢。

市場上看淡日圓的聲音愈來愈多，目前又聽到日圓跌至100的言論，筆者雖同意未來可見100，不過到94至95水平，短線仍傾向需要修正技術走勢，到年中甚至第三季才再次發力向上測試100水平，重要支持就在92.1，一旦跌穿，可以預期更深的調整將會出現。