股海實戰：中傳動 有勢博反彈

內地A股蛇年首個交易日紅盤高開低收，表現令人失望。正正由於上周市場對A股復市後表現過分憧憬，見到尋日A股ETF跌幅普遍較股指跌幅大。個別板塊方面，內銀同內險股回軟，煤炭股沽壓未消，僅城鎮化及新能源概念股繼續輪流炒。

前日發改委公布《半導體照明節能產業規劃》，刺激照明股表現，最靚係隻真明麗（01868），股價急升15%收市。但老實講，照明行業唔係咩高科技行業，入行門檻低，即使預期今年經營環境有改善，但暫未宜對企業轉盈能力作過高期望，跟炒宜注意風險。

國務院同意國民旅遊休閒綱要，目標喺二○二○年前落實職工帶薪年休假制度，城鄉居民旅遊休閒消費水平大幅增長等。講到中資休閒股，又諗起隻令人「激心」嘅中旅（00308），業務發展符合國策方向，股東背景強，不愁休閒旅遊資源，偏偏股價炒極都炒唔起！

中國製藥走勢對辦

建築股繼續有資金追捧，尋日見隻新昌營造（00404）升到上1.62元收市，升幅11%，聽聞正醞釀「配盪」活動，高追宜打醒十二分精神。此外，尋日提及嘅金威啤酒（00124）升4%，收報3.43元，另外阿莊持倉嘅中國製藥（01093）走勢對辦，尋日高位見3.19元，收報3.17元，升幅4.6%，會繼續安坐順風車！

本月以來新能源股氣氛向好，大唐新能源（01798）、華電福新能源（00816）、華能新能源（00958）及中電新能源（00735）月初至今股價最多累升逾一成，主要係市場憧憬兩會將把「新能源」議題放到更高嘅位置，且將有更多有利節能環保嘅政策出台。

中傳動（00658）尋日股價一度搶高至3.57元，收報3.53元，升4%。上月中傳動發盈警，指受銷售、行政及財務成本增加所影響，預計去年度溢利將顯著減少，拖累股價由上月高位4.46元反覆回落至3元邊始回穩。但其實去年風電股業績唔好，應該早喺市場預期之內，反而如今市場在觀望中央加大力度扶持風電行業，包括積極解決風電上網問題，照計今年經營情況有望得到改善，股價不宜過分看淡。現價既已回升至3.5元水平，頗大程度已反映盈警消息，震倉完成。以反彈跌幅嘅0.5計算，短線反彈阻力區喺3.7至3.8元，若能以大成交突破，有望再次挑戰上月高位，支持位可參考10日線3.26元。