樓市出更：細價樓 升到冇氣抖

樓價愈升愈有，就算一向係上車樂園嘅天水圍嘉湖山莊，近日有個三房靚單位，建築呎價都要貴過5,000元轉手，相信九七年後，該屋苑三房單位都未試過咁貴。而買樓真係可以保值，荔枝角美孚新邨一個一手單位，四十年前唔使6萬元買番嚟，依家升值超過100倍，以600萬元賣咗。

細價樓係咁升，中原謝明亮講，嘉湖山莊景湖居4座有個高層單位，建築/實用面積約709/546方呎，望晒米埔全景，加埋靚裝修，有買家見機不可失，即刻用360萬元買入個單位，建築/實用呎價去到5,078/6,593元。劉Sir記得，除九七嗰陣，嘉湖山莊三房單位建築呎價都好似未去過五千元。

個價係咁升，買家見貨就搶。美聯林海成話，荔枝角美孚新邨3期百老滙街57號，中層有個單位，業主一手買入之後無轉過手，內籠裝修保持到依家，買咗相信都要全屋翻新，但個單位近排交吉都賣成600萬元，建築/實用呎價6,857/9,132元。

新港城建呎撲九千

睇番土地註冊處資料，上述呢個單位原業主喺七三年買入，嗰陣6萬元有找，相隔四十年升值逾100倍。

細單位仲係好搶手，中原林少億話，馬鞍山新港城4期F座高層海景單位，賣413.8萬元，建築面積464方呎計，呎價近九千元達8,918元，實用呎價約1.22萬元，創同類新高。置業18黃信安稱，長沙灣星匯居1座高層A室，反價28萬元，賣878萬元，建築呎價約1.06萬元。

宏景綠表速獲承接

至於居屋方面，近排都係熱門話題，富誠地產林栢榮話，有個綠表客驚遲啲班有綠表資格白表客推高個價，睇樓二十四小時內，即以275萬元買鑽石山宏景花園4座高層單位，同類單位建築呎價首次高過五千元，達5,027元。另樂富嘉強苑A座中層6室，反價16萬元，綠表都賣356萬元，並創同類新高，建築呎價4,965元。

利嘉閣地產總裁廖偉強話，居屋雖影響唔到私樓，但上車客要量力而為，唔好因資助而忽略風險；佢覺得一手住宅會好啲，而中小型住宅樓價會升8至10%。