股海實戰：北控水務升浪未止

臨近農曆新年，尋日恒指全日波幅只有百幾點，埋單跌79點，收23,177點，全日成交790億元，睇嚟好多投資者都已經提早收爐。今日係假期前最後一個交易日，照計個市應該會繼續牛皮偏軟，從技術走勢睇，恒指好大機會下試50日線22,930點。

大市尋日表現唔精神，但係隻聯想集團（00992）走勢就相當悅目，股價創8.88元新高，最後以接近高位8.87元收市。聯想家陣已經係個人電腦市場一哥，今次強勢回歸成為恒指成分股，相信股價有機會再試高位，有大行話睇10元，值得密切留意。

金飾股有下調壓力

繼濠賭股之後，尋日到零售金飾股受壓，廣電總局叫停送禮廣告，令奢侈品如名錶金飾的需求受影響，周生生（00116）同埋英皇鐘錶（00887）尋日均跌超過7%，而新上市的時計寶（02033），昨日一度失守招股價1.35元，低見1.31元，最後險守招股價收市。由於受不明朗消息困擾，相信零售金飾股仍有向下調整壓力，暫宜觀望為上。

本港方面，有消息指港府短期會再出招調控樓市，包括開徵二套房額外印花稅和停做第三套房按揭等，但係地產股尋日就無乜反應，好多仲逆市上升，其中新世界發展（00017）更升超過2%，收報13.78元。港府之前亦推出過多項調控樓市措施，但結果係樓價唔單止無回調，反而仲繼續升。其實，地產股之前已經調整咗一排，假如今次措施都係無料到嘅話，隨時會有反彈都唔出奇。

大市近日表現雖然反覆，但係水股表現唔錯，好似隻北控水務（00371），唔覺唔覺又創五十二周新高，尋日高見2.19元，最後以2.17元收市，逆市升1.87%。

北控水務去年底與銀行簽訂1.75億美元定期貸款，當時估計公司業務會有新發展，果然尋日就宣布收購東莞七間目標公司，以擴大內地污水處理業務領域，加重廣東省業務比重。

發改委、財政部和住建部要求各地加快城鎮環境基建，落實中央預算污水垃圾處理投資補助項目，為北控水務帶來商機，加上有母公司北控（00392）作強大後盾，自然有較佳的優勢，預期母公司有機會進一步注入資產。北控水務近日成交顯著增加，而且成功破位而上，相信股價有機會再試新高。