樓市出更：新盤谷餘貨正月有禮

中國人傳統上都鍾意正月攞番個好意頭，所以唔少發展商會趁新春推出置業優惠，畀個甜頭買家，等大家新一年開開心心。華懋集團今年就揀咗3個新盤貨尾送優惠，其中重點催谷嘅青山公路南岸，連車位以好意頭價988萬元起。至於南豐旗下嘅跑馬地雲暉大廈就送價值8萬元露台園藝家具優惠。

華懋集團售樓部經理吳崇武（武官）同劉Sir講，即日起至新十六（二月二十五日）前購買旗下南岸、同區御濤．凱濤，同埋深水埗寓．弍捌，買家可以攞到唔同嘅置業優惠，其中得20伙嘅南岸同剩低11伙嘅御濤．凱濤，兩個青山公路盤就齊齊送車位，分別價值50萬元同40萬元，如果買家唔要車位，更加可以直接扣減樓價。至於寓．弍捌就有九七折同發展商提供嘅七成按揭優惠。

華懋賣剩106伙冇壓力

而代理為搶生意，都齊齊向南岸一手買家送優惠，好似美聯就送出生生猛猛總值3.8萬元嘅足金金蛇，而中原地產就送6.8萬元入伙宴，兩間公司各送5個名額。

武官話，成個集團依家只係得106個新盤貨尾單位等住賣，所以無清貨壓力，目標希望喺今年四月底沽清，料可以收番約莫15億元。反而今年推出嘅全新盤有逾300伙，講緊市值至少70億元，武官話，要去貨，佢都有啲壓力，而頭炮預計會喺三月中登場嘅九龍城金．御門，建築呎價諗緊大概要1.1萬至1.3萬元。

另外，南豐地產部副總經理黎學良話，雲暉大廈尋日開放咗全新B座18樓示範單位畀傳媒參觀，建築面積1,940方呎，考慮緊最快下周畀公眾預約參觀，由尋日起至月底，更會送出每名買家價值8萬元露台園藝家具優惠，名額共3名。

南豐東涌項目來季售

黎氏又話，雲暉大廈喺過去三周再賣6伙，涉資約2.7億元，售價約3,638萬至5,508萬元，建築呎價約18,753至24,639元。

其實該盤已經賣咗19伙，料有機會新春後會加價，加幅維持5%以內；而該盤都租出13伙，呎租約50至60元，餘下單位半數會保留收租。至於南豐地產喺東涌另一個住宅項目，預第二季攞到預售同意書後推出。