期指攻略：市況未明以靜制動

前晚，德國總理默克爾派定心丸，刺激歐元歐股反彈，道指回升99點，港股尋日跟外圍反彈，可惜力度顯然不足，恒指最多升207點，收市前升幅收窄，收23,256點升108點。

國企指數走勢相對更為疲弱，升35點收11,849點，但已十分接近今浪10,190至12,354點升浪的0.236反彈支持11,843點，一旦確認跌穿，有可能要進一步下試0.382升幅回吐支持11,527點。

二月期指高開166點，見23,251點後，全日在高位徘徊，最高曾見23,383點，美中不足是好友未有嘗試回補前日23,448至23,620點的下跌裂口，將變成好倉客短期上攻的重要阻力，一日未收復並企穩阻力樓上，超短線難言穩陣，仲係可升可跌格局。

期指成交比前日少近3萬張，至6.48萬張，經過急跌後，睇好睇淡的都需要時間醞釀下輪攻勢。全日加權平均成交價23,285點，高收市價39點，多少反映昨日唔少試博反彈的好友被綁收場，現惟有一動不如一靜，多看兩日至算。