Fundman睇市：奶粉股 繼續放紙鳶

習近平未正式上場，反貪旋風已吹遍神州，舊年第四季，茅台、五糧液等公費開銷主角首當其衝，相關酒股隊到開巷後，輪到濠賭股隊到一仆一碌。估唔到，中央春節後為肅貪，整頓澳門賭業行動的消息來自英國傳媒，到底有幾堅？由昨日幾個外資大牌浸浸洗住一堆濠賭股，恐怕無十足都有七八成。近半年濠賭股確實升得唔少，唔少芬佬都想搵個藉口賭番轉頭，依家去到三月係反貪高峰期，都係唔好做莊走去做閒好。

前晚德國總理默克爾拍心口，支持西班牙首相拉霍伊，消息支持歐股、歐債反彈，道指也升近百點，可惜，近期升唔起的港股，完全係有心無力，昨恒指收市升得108點報23,256點，只係周二536點跌幅的五分之一。睇沽空連續兩日佔成交比重高於一成，淡友死咬住唔放，博港股24,000點前點都要跌番一陣。盛傳周五政府對樓市再出招，新地（00016）連跌第九日，沽空佔成交兩成，高位計股價唔見十蚊。

今次傳港府五招，連史提芬屋企人也收到地產經紀「依貓」，確實罕有，周五會唔會係壞消息出盡，地產股反彈？由消息發醞釀近兩星期，不排除短線有此可能，睇番地產分類指數自去年六月，未試過跌穿50日線多過兩日，是中線走勢一大參考指標。近日中港地產股齊齊報跌，昨日見恒生地產分類指數（指數成分股有華潤置地（01109）及中國海外（00688）報32,367點，與50日線32,328點一步之遙。如果隊到今日收市，睇怕殺過龍機會好大，不妨搵番隻啱價錢貼價地產輪，試試刀仔鋸大樹。

昨日當炒板塊，當數全城熱話的奶粉短缺事件，兩隻奶粉股完全無視地心吸力，周初市跌照升，昨日市升就升得更勁，合生元（01112）抽升1.7元，報35.25元，再創上市新高，基金開始放紙鳶，訂止賺放心繼續揸。至於雅士利（01230）鑊氣雖稍斂，惟股價有挑戰2.8元頂位之勢，早前已發過盈喜，業績期揸佢相信風險唔大。

頁岩氣股搭順風車

內地短期可能推第三輪頁岩氣探礦權招標，估計中標企業未來三年投入資金達128億元人民幣，令靜咗一排的相關股份，全部撻番着，安東油服（03337）昨勁升12%，陰陰乾近一個月的宏華（00196），升10.5%，華油能源（01251）升3.4%，山東墨龍（00568）亦升2.9%。

去年十二月初史提芬曾推介過墨龍，當時股價只係3.2元，一月中升至4.21元高位，成交減少，股價以時間消化升幅，在3.7至4元之間橫行整固。老實講，呢間內地三大石油石化集團合資格油套管供應商，近期只有一單獲批發債消息，無乜新聞。

不過，股價炒完一輪後跌唔落，仲要其他頁岩氣股價有雙位數升幅，佢仲係老僧入定一樣，吸引到在下注意。基本因素上，公司慣常在四月初公布成績表，截至去年九月底首三季賺1.2億元人民幣，最後一季斷估無大礙，條數點都唔衰得過早兩年。昨日成交初見鑊氣，應該可以放心搭轉順風車也。