樓市出更：中環商廈舞起 迎新招

英國皇家特許測量師學會（RICS）最新調查話香港區商用物業投資查詢及需求比例顯著增加，兩項比例上升到52%及32%，而一旦政府再出招，本港商用物業資產價格升幅勢好過舊年。同時間尋日已聽到港島有多達4宗成交；喺幾個鐘內金鐘力寶中心先後錄到兩次破頂成交，最新呎價去到2.85萬元，破晒全港商廈呎價最高，同日美國銀行中心亦有中層單位呎價達2.8萬元創物業新高。

根據RICS舊年第四季嘅全球商業地產調查，香港喺投資查詢方面嘅比例由28%急升至52%，需求方面亦由25%升至32%，反映住宅壓市措施利好商業物業。

RICS：打壓住宅益商廈

RICS香港區理事會主席關健話，如果再嚟新措施，資產價格升幅將會比舊年更好。該行David Faulkner話，未來幾年每年嘅商廈新供應只約100萬方呎，供應短缺繼續為租金帶動支持，今年商廈整體租金或升約5%。

近排港島甲級商廈做價回勇，中原徐志聰尋日晏晝同劉Sir講，力寶中心2座高層07室，以約3,857萬元賣咗，呎價2.61萬元，呎價係幢大廈新高，原業主一年半帳面袋逾900萬元，點知當晚有代理爆料，力寶中心1座高層全層以約5億元售出，呎價仲高，達約2.85萬元，吳姓原業主九年帳面勁賺逾3.5億元，賺幅近2.4倍。而美國銀行中心中層單位，就以5,140幾萬元賣出，呎價大約2.8萬元，係該廈呎價新高。

尖沙咀乙廈半年貴25%

唔少投資者都轉炒尖沙咀乙級商廈，帶動做價急升，睇番香港置業工商舖同埋市場嘅資料，依家尖沙咀乙級商廈平均呎價差唔多8,500元，半年左右升咗約25%，反而同區依家甲級商廈平均呎價只企穩12,500元左右，同舊年中比，只多咗約5%。另該行黃璜話，尖沙咀康宏廣場中層16至17室剛以7,124萬沽出，呎價約1.32萬元。

有消息話，爪哇控股（00251）嘅黃大仙滙豪山地下及1樓零售部分獲出價約1.6億元洽購，呎價5,700多元。