魚缸Blogger：亞太衞星 盈喜帶動

臨近歲晚，依家缸邊友心情都幾複雜，一方面明知指數已經頂頂哋，再追入值博率未變高，但偏偏見到指數高企不下，中、美及本港宏觀經濟數據亦唔係差，美股、A股又輪流接力上升，要單邊做淡港股，真係未必沽得落手，但揸晒現金亦唔係路，所以如今惟有盡量避免睇指數，亦唔會揸全現金，買啲較穩陣嘅高息股坐定定，貪其攻守兼備，再唔係就買些少熊證傍吓身。

上周五有隻嘅股仔亞太衞星（01045）殺入升幅榜，以大裂口高開21.9%後，喺成交激增下，即市一度挾到去3.06元，創咗五十二周新高，埋單仍升19%，收報2.88元，後市應該仲有睇頭。

亞衞主要從事在軌衞星、衞星電視廣播及上行服務、衞星電訊及數據中心服務等，現時擁有6顆在軌衞星，覆蓋全球約75%人口的地區，行業具獨特性。公司喺當日發盈喜，預期截至去年底止全年純利將比一一年大幅增長，原因係期內亞太7號衞星開始啟用，帶動其經營溢利急升。去年亞太7號衞星成功接替退役的亞太2R衞星，因為性能同覆蓋能力較高，所以客戶訂購非常踴躍，無疑會成為佢未來增長亮點。至於亞太5、6號衞星，使用率分別為82.1%及75.18%，亦都仲有上升空間。

睇番幅圖，亞衞股價起步係近一個月嘅事，若短線回吐仲守得住2.6元，小注博佢破頂見3.3元。

亞太衞星（01045）

阻力位：3.3元

支持位：2.6元