股海實戰：農行 上車未算遲

上周港股繼續喺高位運行，恒指埋單升141點，10日線失而復得。其實唔少炒家都已歲晚收爐，炒風亦有所收斂，若非上周五A股滬綜指升穿2,400點收市，帶動本港嘅中資金融股發力，睇怕一周計未必能交出升幅。展望本周，嚟緊周日就係大年初一，假期氣氛轉濃，建議減少炒作，將停留喺魚缸嘅資金放喺防守性股份，咁就可以安心去辦年貨過春節！

阿莊上周五坐言起行沽出天能（00819），換入中銀香港（02388）一萬股，可能會睇位增持多一萬股，至於手持嘅中國製藥（01093）則會繼續持有，另周內會睇位買番兩至三萬股滬杭甬（00576），主要係呢期券商股估值上升，滬杭甬持有嘅券商業務可得益。

中資金融股較穩陣

執筆時聽到大笨象（00005）出售平保（02318）股權交易獲中央放行，睇怕周初二者又成魚缸焦點，但能唔能夠刺激恒指再上高位就兩睇，事關聽地產經紀講，特區政府最快本周五宣布就港人購買第二間樓徵稅，難怪上周地主股係咁被人質，若然消息屬實，唔知市場點反應，所以對本周市況有啲保留。

睇來睇去，也許中資金融股仍然係相對穩陣嘅選擇。上周內地發一號文件，重點非如過往單純增加農機補貼之類，而係強調要革新農村經營體制及徵地制度等等，目的係要確保農民能從現代化農業及城鎮化發展中得到益處，真正讓農民富起來。

農村發展必須有金融作配套，所以見到上周五內銀股中，兩隻兼具農村經濟同金融概念嘅重農行（03618）及農行（01288）表現最佳，分別升4%及3%，其中農行以全日高位4.35元收市。

阿莊呢兩個月唔只一次講過，農行能夠上番4元樓上係唔簡單，皆因一一年該股被空軍襲擊前嘅重貨區，正正係喺4至4.2元區域。既然已確認轉勢，以現價市盈率9倍、市帳率1.7倍，息率3.7厘，站喺中線角度，依家上車都未算遲，睇吓4.1至4.2元水平有冇上車機會，六個月目標見4.8元（順道博六月收埋股息），跌穿3.9元止蝕。