樓市出更：觀塘牛頭角道 一鋪難求

觀塘市中心重建計劃如火如荼，有代理報料，近幾個月鄰近嘅牛頭角道地舖出現罕見嘅內地豪客問盤買舖情況。不過，條街暫無地舖主動放盤，變成「有客無盤」，原因係有唔少承租能力強嘅租戶進駐，加埋業主睇好後市，寧願收租封盤。好似原本由粉麵店租咗逾六年嘅一個地舖，半年前畀連鎖時裝店租咗，估計每月新租金約7萬元，比之前高逾四成。

劉Sir知道，市建局觀塘市中心重建項目已經收咗逾九成六業權，其中月華街第一發展區住宅上蓋項目預期可以喺今年上半年預售，加埋起動九龍東，成個區上班一族消費能力「升晒呢」，零售前景點會唔旺。

租貴四成 業主唔憂賣

有代理話，最近觀塘重建區的一段牛頭角道街舖有約60間，差唔多近三成商戶都係連鎖電訊公司、時裝店同餐飲集團等，由於租客承租能力比以前高，租金自然水漲船高。依家上述街道呎租介乎約40至70幾元左右，比兩年前多咗四成，收租回報有3厘，業主都唔憂賣。

難怪承租重建範圍內康寧道一個地舖嘅鄭先生呻：「租咗上址已差唔多三十年，經營配對鎖匙，個舖面積只係100多方呎左右，依家月租約萬五。早前都有代理介紹我睇牛頭角道地舖轉租，我都無理，原因只有一個，做埋都唔夠畀租，所以租期完結後會退休。」

另外，各路資金湧入商舖市場，世紀21君怡地產柯錦文話：「近排問牛頭角道地舖買賣嘅人多好多，當中唔少係內地人同埋區內廠家，佢哋『walk in』直接問盤，有啲預算投資額達約半億元。」

逾億元買賣 半年3宗

睇番啲資料，過去半年鄰近重建項目的牛頭角道，加埋大約有3宗過億元商舖買賣，其中，有個單號地下至2樓，面積大約3萬方呎，月前畀朱姓投資者以約1.95億元買咗，呎價6,300幾元，業主大約八個月帳面袋約1,500萬元，賺幅超過8%。