市場徐想：遠東環球 憧憬注資

遠東環球（00830）自從去年獲中國建築（03311）入股成為大股東後，股價一直喺1.5元橫行，但近排表現突出，短短一個月就勁升六成。一半係因為公司今年接獲嘅工程合約，預計會有強勁增長；另一半係因為受資金炒作內房殼股注資概念。

從事外牆工程嘅遠東環球，今年頭兩個禮拜已經新簽咗啲工程合約，價值3.36億元，相等於公司全年目標嘅19%。Prof. J估佢要全年達標應該都無難度，何況仲未計如果母公司分判啲工程畀佢哋，接獲嘅合約升幅有機會仲誇張。

雖然之前遠東環球發盈警，話舊年業績會見紅，但Prof. J認為今次業績盈轉虧純粹同一次性重組開支有關，毋須太在意。如果資金繼續炒作內房殼股注資概念，不妨小注跟入，不過記得要適時落車。