股海實戰：中銀香港 放心持有

美聯儲局維持利率及量化寬鬆政策不變，港股則出現獲利回吐，恒指一度回落至低位見23,667點，收市報23,729點，跌92點，期指轉高水46點。資金繼續回流防守性板塊，中資電力股全線做好，想趁熱鬧可留意中國電力（02380），博出多支陽燭，叩3元大關。

前日話隻天能（00819）再上唔番5.3元會睇位落車，但尋日隻股又衝番上高位見5.49元，收報5.46元，逆市升3%。下周一就係立春，歲晚收爐氣氛日濃，所以阿莊都係諗住隨時沽貨食胡。

有內地傳媒報道，針對近期北京樓市炒風又再升溫，北京市將部署京版房產稅，見尋日內房股立刻發軟蹄，中海（00688）、潤地（01109）及恒大（03333）跌2至3%。不過，執筆時傳來北京市地稅局已作否認。阿莊覺得，喺通脹壓力上升之下，內房樓價再癲只會惹來中央再次出手，放定風聲等市場自律亦唔出奇。至於內房股，反彈至現水平估值已唔算得上係便宜，加上唔少房企都已完成抽水，春節長假樓市例靜，短線冇咩炒上誘因，暫時可以睇少一個板塊。

投資者避險意識上升，資金回流中資電力股，本地公用股亦有追捧，恒生公用指數尋日再創五十二周新高53,848點。有智慧不如趨勢，若想將部分資金停泊喺防守性股份過新歲，兩隻心水選擇係中銀香港（02388）同領匯（00823）。

中銀一向係「好息之徒」嘅至愛，現價計市帳率2.1倍，息率4厘，隨着兩地金融業關係日益密切、前海發展，人民幣持續推進國際化進程，都有利中銀嘅業務發展，中長線大可放心持有。尋日德意志便將其目標價上調至31.5元，不妨作為參考，短線回吐喺25至26元水平可積極考慮。

領匯有望重展升勢

至於領匯，主營公屋商場及車位租務，租金收入穩定而能見度高，加上息率亦有3.4厘，雖然去年單位價格錄得可觀升幅，但估值依然有數得計。

近兩個月領匯股價喺38至40元水平整固，若然阿莊指首季股市已見浪頂，調整即將出現嘅睇法正確，相信嚟緊資金將回流低啤打值之選，領匯有望重展升勢，中線目標反覆上試43至45元區域，跌穿38元止蝕。