樓市出更：將軍澳屋仔 呎價睇3萬

將軍澳區呢幾年發展迅速，但咁多年全區偏偏無洋房供應。劉Sir八到，嚟緊將軍澳會陸續有洋房出現，屋宇署啱啱公布嘅最新建築圖則，新地（00016）將軍澳南限量項目作洋房同分層住宅混合發展，提供7座3層高洋房。而區內分層新盤天晉都做到呎價2萬元，估計洋房呎價可以更高，做到3萬元一呎都唔奇。

劉Sir同大家分享屋宇署最新資料，舊年十二月批出嘅21份建築圖則，涉及8項住宅及商住項目，當中唔少係來自政府呢兩年批出嘅地皮，好似上述將軍澳第66A區限量項目，獲該署批建7座3層高洋房同埋4座28層高分層住宅，住宅及商業樓面就大概72.1萬及7.2萬方呎。

唔好睇小呢7座洋房，雖然數目唔係好多，但劉Sir相信可以為將軍澳未來住宅市道帶來新景象，呎價肯定可以創新高，事關將軍澳區咁多年來都無洋房供應，就算未來同區有同類供應，相信數量亦唔會太多。

中海鴨脷洲准建兩幢

另外，中國海外（00688）去年三月以約萬一元一呎買入嘅鴨脷洲海旁道及鴨脷洲徑交界豪宅項目，屋宇署亦批准興建2幢32層高分層豪宅，另有2層地庫，總樓面大約23萬方呎。而近年積極發展離島住宅嘅信置（00083），旗下大嶼山梅窩商住項目亦批建1幢3層高商住物業，總樓面約莫5萬方呎。而述3項獲批圖則項目，其實都係政府呢兩年主動推出嘅新供應。

住宅落成量四年新高

劉Sir發現，原來舊年十二月有多達3,266個住宅單位落成，屈指一算，按月激增近98倍，仲創埋○八年十二月後近四年新高，主要是期內有兩項大型項目落成，包括長實（00001）嘅將軍澳領凱及新地嘅屯門瓏門，落成單位分別1,168及1,080伙。同月落成嘅九建（00034）旺角麥花臣匯，提供293伙，整體發水比例約25.85%。反而，舊年十二月私宅動工單位得145伙，按月減少約五成，係近十四個月低位。