魚缸Blogger：金風科技 可炒落後

去年風電股表現慘不忍睹，但隨住相關扶持政策出台，上月板塊開始發力追落後。尋日金風科技（02208）突然爆上，以接近全日高位3.79元收市，升幅8.5%，睇勢近呢兩個星期嘅調整暫時告一段落，唔大貪先睇4個半。

上月國家能源局批准新疆、雲南等16省區風電項目，裝機量逾852萬千瓦，而內地亦剛公布去年風電併網總量6,083萬千瓦，發電量1,004億千瓦時，風電成功超越核電，成為繼煤電同水電後嘅第三大電源，估計今年行業將會加快調整，前景能見度唔係太差。

技術水平領先同業

金風自主研發的2.5MW直驅永磁風力發電機組，啱啱拎咗國家能源科技進步一等獎，即係代表佢嘅研發能力已經達到同業領先水平，擁有技術優勢。睇番幅圖，股價由一○年上市價17.98元，碌到落去年得兩個幾，想炒落後兼環保節能概念的話，可以諗諗佢。

金風科技（02208）

阻力位：4.50元

支持位：3.44元