期指攻略：健康調整有利後市

期指結算日，恒指昨最高升至23,916點，創二十一個月高位，美中不足係昨日現貨主板成交未算配合，得761億元。午後恒指波幅得47點，若非現貨收市後二月期指愈隊愈低，玩到23,804點，低水18點收市，期指客可能瞓着。

好友今個月大獲全勝，期指由月頭挾到月尾，期指尾市突然炒低水之外，收市後公布的沽空數字，昨日沽空金額69.6億，比周二增加42%，沽空佔成交比例由6.48%升至9.14%，是一月以來最多，多少反映部分淡友已經趁結算日作部署，大市是否先來個健康調整？尤其近日大市應跌唔跌，好淡雙方僵持不下，先回吐對兩方面都有好處。

中長期睇，一一年海嘯第一波升浪由16,170點，升至21,760點短期見頂，整個升浪的1.382阻力，剛好在23,895點，昨日即市破了，是否能一鼓作氣攻上1.5，即24,555點水平，就連筆者這等好友也不太願意相信。姑勿論如何，先出現調整測試下面的支持力，才去想再開好倉。