股海實戰：中糧包裝 值得跟進

期指結算日，恒指隨外圍升市抽高，曾高見23,916點，收報23,822點，升166點。雖然如此，阿莊依然相信，二月將迎來調整市，只係喺調整真正來臨前，恒指會否先踢穿24,000點，反正現水平相差不遠，抽穿24,000關，盡殺熊仔再掉頭屠牛嘅可能性不能抹煞。

美股熱炒經濟復甦概念，三大主要指數不斷走高，並有分析指今年將會出現全球資金乾坤大挪移（A Great Rotation），即由○八年起逾萬億美金流入債市嘅趨勢，已靜靜地改變方向，重投股市懷抱。

資金轉移棄債投股

有統計指出，自去年六月以來，由美國債市流出嘅資金已超過60億美元，促使這一轉變嘅背景，乃美國不斷實施量寬，令國債收益率跌至歷史低位。每年一月都係美國退休基金等長錢布置新倉位嘅時候，近期美股不斷尋頂顯示資金流入股市。但當然，即使長期資金流轉勢，期間難免會有反覆，更何況過去半年指數升幅可觀，總要時間消化，中長線唔使憂冇位入市。

講番個股，中糧包裝（00906）股價由上周五低位5.56元，升上尋日高位6.24元收市，走勢相當靚仔！公司主要從事產銷應用於食品、飲料及日化產品等消費品所使用包裝產品，包括鋁製兩片飲料罐及馬口鐵三片飲料罐。去年上半年收入同比增長25.6%至26.56億人仔，淨利潤增31%至1.79億人仔，毛利率16.9%。

由於成都及天津嘅兩片罐生產線喺去年下半年正式投產，去年底引進首條鋁製單片罐生產線投入安裝，有助擴闊客戶基礎至醫藥及個人護理等高端產品嘅包裝。據公司網頁資料，去年底旗下成都兩罐廠房單彩印機生產加多寶日產量突破222萬個，而近日國家統計局等參與進行嘅一二年飲料業一至三季度運行狀況分析報告亦顯示，加多寶銷量同比增長超過五成，市佔率超過72%，穩坐內地涼茶行業一哥地位。加多寶既為中糧包裝嘅主要客戶之一，後者股價受追捧亦不無道理。

由於走勢已呈突破，且成交配合，可以考慮跟進。翻查紀錄，此股喺○九年十一月股價曾高見11.6元，去年十月見低位2.55元止跌回穩，以反彈跌幅0.5計算，剛好喺7元大關，就以此為目標價，初步支持喺5.9元。