樓市出更：名店回頭搶租廣東道

內地人對鐘錶珠寶嘅興趣減，一線購物區如尖沙咀廣東道唔少該類商戶都走人，多年前曾盤據該街道嘅德國服裝品牌想重返舊地。有代理話，個品牌傾緊早排嗌頂租幾個月，由鐘錶租用嘅地舖連1、2樓，同埋其他租戶租用嘅隔籬地庫及樓上兩層，月租講緊850萬元。呢個月商場「拆售」旺，本月摸貨逾600宗，比舊年一月多逾53倍，創新高。

個代理同劉Sir講，上述廣東道鐘錶租緊嘅地舖面積共約8,000多方呎，依家月租近350萬元，呎租近440元，而上述品牌依家連同地庫同樓上兩層一齊傾租，面積加埋大約1.6萬方呎，月租講緊850萬元，喺廣東道呢段單一舖租計，租金都算幾高。

聽講單刁差唔多近尾聲，至於點解個時裝品牌咁主動傾租，個代理話，佢以前租過廣東道，之後走咗，眼見唔少賣貴價衫同行喺度愈來愈好生意，所以花多啲錢，重返舊地。

銅鑼灣舖新租升逾倍

廣東道店舖大租再現曙光，喺上址隔籬有個原由化妝品租用，但已交吉近一年嘅地舖，依家分別有兩間包括時裝在內嘅商戶傾緊租，若能連同廣告位一併承租，月租講緊差唔多600萬元。另外銅鑼灣耀華街雙號地舖至3樓，原由專攻年輕消費群租用嘅連鎖服裝店租用，依家有客傾緊，新租每月大約100萬元，同舊租比多約1.7倍。

另外，睇番美聯工商舖研究部同埋市場資料，今個月工商、商廈同埋店舖嘅摸貨宗數同摸貨比率，都已經倍數遠超過去兩年嘅一月份，而炒味最濃嘅店舖，因為有多個「拆場」，所以期內摸貨逾600宗，比去年一月已經多超過53倍，由於唔少呢類摸貨係「大孖沙」炒出嚟，所以摸貨比率差唔多35%，同創歷年新高。

首都廣場600舖套30億

今個月店舖炒賣中最勁，係投資者尹柏權等閃電摸出嘅尖沙咀首都廣場1至3樓共約600個舖，只係約三天就火速套現約30億元。除店舖外，本月工廈短炒亦大熱，交投徘徊200宗水平，而本月亦錄到約280宗工廈摸貨，比去年一月全月嘅15宗，大幅增加逾17倍，摸貨比率都有21%。

舖壇老手黃海明話，雖然近排奢侈品消費差咗，但本地人使錢無少到，店舖租售點都有支持，加埋市場預期政府短期內都唔會出招打壓工商舖，增強資金轉投嘅信心。

劉Sir