魚缸Blogger：中集 續炒前海概念

呢期前海概念股暫時回一回氣，如深圳國際（00152）就喺1.05元左右徘徊，而另一隻中集集團（02039），尋日美銀美林出報告首次叫人買，畀佢目標價18.95元，帶旺股價逆市微升1.6%，收報16.1元，查實揀得啱受惠股，等耐少少又有何妨呢？

主要從事乾貨集裝箱業務嘅中集，未來目標係將該業務的分部盈利貢獻於五年內降至佔整體的40%水平，令收入來源更穩定及多元化。公司除咗B轉H成功響頭炮外，亦具備前海概念，皆因同深國一樣，直接擁有前海地王部分權益，估計隨住相關消息陸續出現，將會進一步帶動股價，但考慮到政策及補地價安排風險，只建議小注怡情。

至於美林就話，中集擁有規模優勢兼業務多元化，而集裝箱市場供求平衡，有利行業發展同穩定議價能力，加埋公司出售土儲嘅潛在收益，所以睇好佢多過勝獅貨櫃（00716）。

中集集團（02039）

阻力位：18.50元

支持位：14.92元