Fundman睇市：雅士利 有力返高位

唔經唔覺，港股從去年六月初18,056點起步，至今升浪已延續超過七個月，仲一直未見一個較具規模調整，近兩星期，愈來愈多評論貼大市見頂，偏偏港股狂牛就係唔願回頭。昨日恒指跌16點，報23,655點，由於高盛批工行（01398）上板，令主板成交反彈至756億元，不過指數波幅極窄，恒指高低位相距只有105點，唯一較理想的指標，是大市升跌股份比例反彈，升跌是53對47，是過去五個交易日最高。二三線經過一輪調整，炒風有復燃迹象。前日話亞洲貨幣有回軟迹象，有可能是資金流出股市先兆，過去兩日港匯有頗大回吐壓力，由7.754跌至7.760。

新西蘭奶粉受雙氰胺污染的事件，未發酵已劇終，新西蘭大使公開道歉兼表明全面停用雙氰胺，加埋內地未見產品驗出有問題，兩隻奶粉股從上周低位強力反彈，雅士利（01230）昨升4%，合生元（01112）升2.8%，收市計更創歷史新高。

近期水貨客來港掃奶粉搞到全城關注，同樣情況，其實在全球多華人聚居的城市也有出現，事件說明，內地消費者對內地品牌信心不足。近幾個月內地多次傳出研究放寬一孩政策，講真，中國無可能全部BB食幾百蚊人仔一罐的水貨奶粉，有外資股東參股的本地品牌始終會有市場。兩隻奶粉股之中，雅士利仲未返回早前高位，值得花時間睇睇。

高盛自○九年至今，幾乎一年一度減持手上工行股份，周一再以每股5.77元，較市價折讓3%配售13.51億股，套現約10億美元，假如對上一次，即一一年四月高盛持股量低於5%的「隱身線」後無再沽貨的話，估計其手上還保留30億股，唔計多年收息，仲有80億元以上帳面利潤可以隨時落袋。

內銀股可安心撈貨

睇番一一年高盛批完工行後，股價級級落，接貨者要捱價的往績，佩服高盛時機掌握好之外，也替投資內銀股的股民有些少憂心。然而，昨日飯局上，聽有份參與的賓架話今次反應估唔到咁熱烈，超額4倍以上，加埋工行股價全日都無試過跌破批股價，情況似乎唔係想像中咁壞。

唔少中港股票基金，都錯過去年第四季的升浪，歐美的銀行股在過去半年升幅驚人，相比之下，內銀股無論估值及升幅上，都及不上海外銀行。像工行這間全球市值最大銀行，一三年預期市盈率只得6.8倍，股息率接近5厘，在貸款質素因經濟好轉而不再轉壞的共識下，估值其實平得有點不合理，至少是較歷史估值中位數10.5倍有相當大的折讓，更遑論資產質素以及對息差更敏感，而估值又更低的中信銀行（00998）及交通銀行（03328）。或許，精密計算時機的高盛沽貨，會帶來短期震盪，若調整出現，內銀是較為可以安心撈底博反彈的板塊。