股海實戰：中海石化 向6元關推進

恒指繼續窄幅上落，正所謂「風平浪靜雨前夕」，加埋大行落力做配股趕搭尾班車抽水，港匯又持續轉弱，一旦確認有熱錢流出，調整浪便開始，宜做定首季已見浪頂嘅心理準備！

藍籌股大笨象（00005）及中移（00941）輪流發力，但明顯見到近期有資金回流至公用股及房託基金，反映投資者風險意識增強。阿莊認為，若然近期才追細價股，唔好磨爛蓆，到止蝕價就要嚴格執行，因為一個浪冚埋嚟，傷得最重同需要更多時間復原嘅，往往係啲冇基本因素支持嘅細價股。

內地獲准進行融資融券嘅股份數目將增加，但本港兩隻大型內地券商股未見刺激，呈個別發展，海通（06837）跌0.1%、中信証券（06030）升0.5%，反而中資背景本地券商股則做好，申銀（00218）、第一上海（00227）、國泰君安（01788）及海通國際（00665）升幅介乎4.5至7%。

尋日醫藥股都有異動，同仁堂科技（01666）、廣藥（00874）及山東威高（01066）升幅介乎2至8%，阿莊持有嘅中國製藥（01093）升1%，收報2.87元，暫會繼續持有。至於持倉中嘅天能（00819）唔多盞鬼，短線上唔番5.3元會睇位落車。

尋日傳來內地工信部正式通過審查山西、上海兩地甲醇汽車試點實施方案，意味由去年三月開設嘅試點將正式實施，為甲醇產品開拓新市場。有分析指，預計到二○年，內地甲醇需求量將增至1億噸，這為甲醇生產商帶來可觀嘅發展空間。事實上，近期內地主要城市出現嚴重空氣污染，促使當局加大決心正視空氣污染問題，以甲醇汽油作為替代燃料，無論喺價格同排放都能迎合政策方向。

受惠甲醇價格回升

中海石化（03983）主營化肥及化工業務，除了尿素及磷肥外，還產銷甲醇。去年上半年，其甲醇業務實現對外收入16.66億人仔，同比大致持平，主要係旗下內蒙古天野化工首季供氣嚴重不足導致甲醇裝置停車83天，而海南甲醇二期裝置喺去年初亦大修18天，但期內甲醇銷售價格上升有助抵銷部分影響。截至本月廿一日，甲醇價格已較去年中回升逾一成，料有利公司業務表現。

近年中央提高新上煤製甲醇項目嘅准入門檻，如今又落實推動甲醇汽車應用，有利大型業者加快相關業務發展。再睇其股價由上周高位5.8元回落至本周初低位5.34元回穩，尋日逆市升2%，收報5.54元，短線可再向6元關推進，50日及250日線結集喺5.2元水平，不宜有失。