樓市出更：商舖拆售 恐防炒燶

市場連月瘋狂搶爆多個拆售嘅商場舖，包括荃灣地皇廣場、荃立方同尖沙咀首都廣場合共逾千個舖位，甫開賣已全數火速沽清，唔少買家即時嗌高一、兩成放賣。不過，市場反應認真麻麻，個別仲委託拍賣行拍賣，但無人吼。荃灣地皇廣場有個摸貨舖就以蝕讓價開價，表明開價即賣，比購入價低成21萬元，勢炒燶出貨。

代理老友同劉Sir講，商場舖位細細件，好多買家貪佢涉額細，又有約4至5厘嘅可觀租金保證，所以呢類物業拆售消息一出，即現搶購潮。但熱潮過後，市場陸續都有唔少呢類摸貨舖位放售，不過，整體反應一般，有啲買家甚至透過私人拍賣行拍賣。

減價翻叮料蝕21萬

代理朋友話，拍賣場大大話話有成十幾二十件呢啲摸貨，不過，拍完再拍都無人吼。嚟緊地皇廣場有個舖位翻叮再拍，建築面積約78方呎，仲註明「業主蝕讓，開價即售，不設收回」，情況都咪話唔慘淡。

睇番拍賣行資料，呢個位於1樓嘅單號樓上舖，早前曾經以420萬元推出拍賣，不過無人承價下被收回，今次再拍開價減5%至399萬元，建築呎價只約1.6萬元，劉Sir問過代理老友，佢話呢個舖位嘅購入價，係420萬元，如果今次一口價賣咗，帳面都要蝕成21萬元。

荃立方早前因圖則與面積有變，買家可以揀唔要件貨，唔少投資者為咗甩身，已錄得逾百個取消交易。聽拍賣行負責人話，市場愈來愈多呢啲商場舖位摸貨，相信拍賣開價最少要減價一成，先可吸引準買家注意。

麗豪閣車位搶高13%

另外車位承接力持續，中半山麗豪閣有車位尋日透過環亞拍賣行易手，成交價59萬元，搶高約13.5%。而旺角好景商業中心中層一個寫字樓摸貨，實用面積約103方呎，拍賣前以165萬元沽，屬好價。