期指攻略：市況牛皮靜待結算

尋日A股勁升2.4%，對港股起到一定支持，可惜近期港股動力減弱，缺乏新消息刺激。尋日恒指早市升見23,736點，創今浪新高位後，好友再攻的興趣唔大，橫行悶局捱到收市，升91點，報23,671點，主板成交674億元，是踏入一月以來第二低紀錄。

炒股唔炒市，確實不是港股專利，美國恐慌指數（VIX）近期拾級向下，去到五年低位，而恒指波幅指數，上星期亦創下12.18的有紀錄以來新低。市場幾乎一面倒看好之際，本應嘗試以逆向思維去試沽，奈何筆者也想不到，資金充裕，中國經濟復甦，歐美股市強勢，可以有甚麼支持做淡的理據。

一月份，撇除首個交易日超過600點的抽升，基本上恒指波幅是罕見地狹窄，在23,088至昨日高位23,736點之間的648點運行。今個月與其搵唔到錢，不如等結算後再算，尋日睇見就算一月23,600或23,800點，無論Call或Put，得番唔夠50點水位，為粒糖輸間廠就無謂。